Parlamento Nasional (PN) ninia Komisaun B ne’ebe trata asunto defesa no seguransa dezafia kapasidade membro Polisia Nasional Timor-Leste (PNTL) nia konaba oinsa halo identifikasaun ba droga, tanba dala barak ona sira sempre falha iha identifikasaun no investigasaun.

Deputado Komisaun B David Dias Ximenis “Mandati” hateten, kuando deskonfia ona kazu ruma presija halo verifikasaun klean molok foti desizaun.

Deputado Komisaun B David Dias Ximenis “Mandati” hateten, kuando deskonfia ona kazu ruma presija halo verifikasaun klean molok foti desizaun, nune’e bele hatudu rezultado ne’ebe mak lolos nune’e labele halo paniku sosiedade liu-liu konaba identifikasaun droga iha ilhas Nossa Senhora de Asunsaun nian foin lalalis ne’e.

“Husi falhansu hirak ne’e Parlamento Nasional dezafia kapasidade membro PNTL liu-liu investigasaun kriminal nian konaba oinsa atu identifika kazu droga sira ho lolos,” Deputado Mandati dehan.

Tanba ne’e nia dehan, dala ruma ho falhasu hira ne’e movimento droga iha Timor-Leste la’o hela mos labele detekta ne’e hatudu katak sistema seguransa sei fraku.

“Kuando ita deskonfia buat ruma ita presija halo peskija hodi hatudo provas no molok to’o iha deskonfia ita presija iha indikasaun,” nia hateten.

Tanba ne’e nia dehan, formasaun ba membro Polisia Nasional Timor-Leste (PNTL) liu-liu investigasaun kriminal sira tenke espesifiku tenke reforsa iha identifikasaun no oinsa atu bele detekta buat ruma nune’e sira bele serviso ho profesionalismo hodi hapara movimento droga iha Timor-Leste.

Iha parte seluk, Komisario Polisia Nasional Timor-Leste (PNTL), Faustinho da Costa, hateten kapasidade membro PNTL ne’e maximo hodi halo sira nia serviso liu-liu investigasaun kriminal ne’e la iha duvida.

“Dala ruma iha prosesu identifikasaun falha ne’e la’os husi Polisia Nasional Timor-Leste (PNTL) maibe husi se mak kaer makina hodi halo teste iha fronteira. Ita nia knar mak kuando deskunfia ona ita tenke hatudo provas atu los ka lalos,” nia dehan.

Maibe nia dehan, Komando PNTL nafatin simu no agradese ba kritika sira ne’e atu nune’e bele hadiak diak liu tan kapasidade no profesionalismu serviso polisia nian.