Quarta, Novembro 25, 2020
Total visitors: 536834

Kordenadora Geral Komisaun Nasional Kombate Surtu COVID-19, Doutora Odete da Silva Viegas hateten aplikasaun estado emergensia ne’e desizaun autoridade maximu nasaun nian, maibe hare ba situasaun atual presiza halo vijilansia nafatin tanba situasaun grave bele akontese kualker tempu.

Kordenadora Geral Komisaun Nasional Kombate Surtu COVID-19, Doutora Odete da Silva Viegas hateten aplikasaun estado emergensia ne’e desizaun autoridade maximu nasaun nian.

Nia konsiente, kazu positivu ne’ebe registu laos kazu grave no laiha ema mate tanba COVID-19, maibe realidade hatudu kazu sira ne’e importadu no sidadaun sira kontinua tama mai rai laran ho dalan ilegal.

“Desizaun hatur estado emergensia ne’e laos ami nia kompetensia, ne’e kompetensia autoridade maximu iha nasaun ne’e foti. Maibe hare ba situasaun ne’ebe iha, ita tenke vijilante nafatin tanba bele akontese iha momentu saida deit ho kazu ida bele duplika sai bo’ot,” nia hateten.

Nia fo ezemplu, dia 26 kazu positivu ida ne’ebe tama iha loron 10 Outubro hetan rekuperasaun kazu foun ida tama fali, signifika sei iha risku bo’ot tanba ne’e kondisoens sira ne’e nesesario atu bele haforsa servisu vijilansia iha rai laran.

Nia informa, sira mos dezenvolve ona kriteria no kustu teste COVID-19 tanba governu hasai ona desizaun ida katak sidadaun ne’ebe tama ilegal sei selu rasik hahan no teste.

Nia dehan, governu la bandu ema nia direitu atu tama sai rai laran, maibe tenke tama sai liu husi dalan legal atu bele hetan kontrolu ne’ebe maximu.

Iha fulan hira liu ba governu aprezenta regime juridiku kona ba vijilansia sanitaria no epidemiologia, maibe presidente veta tanba ne’e Ministerio da Saúde hola fali desizaun ida halo alterasaun ba lei sistema saúde no 10/2004 artigu 10 no 11 hodi inklui asuntu balun relasiona ho kuarantina. Maibe lei ne’e seidauk halo diskusaun tanba ne’e kontinau aplika estado emergensia ba prevensaun COVID-19.

Iha parte seluk, diretur Organizasaun Luta Hamutuk, Jose da Costa hateten estado emergensia mak baze fundamentu ida atu kontrola fronteira no aeroportu sira tanba seidauk iha lei atu bele kontrola.

Nia mos konkorda ho desizaun governu nian atu fo sansaun ba sidadaun sira ne’ebe tama ilegalmente mai rai laran tanba risku bo’ot no bele sai knal ida ba transmisaun kazu foun iha rai laran.

“Hau hanoin presiza kriminaliza tan atu responsabiliza aktu ne’e tanba Indonesia nia kazu sa’e ba beibeik no movimentu sira ne’e kuaze mai husi Indonesia. Entaun ita tenke fo presaun makas sidadaun sira atu labele halo arbiru,” nia hateten.

Nia dehan, ho aplikasaun sansaun sidadaun ne’ebe tama ilegal sei selu mesak kuarantina no alimentasaun governu sei la selu, bele kontrola diak liu tan atu bele prevene moras ne’e tanba ho ida ne’e numeru tama ilegal sei menus.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04