DIFF Kuntinua Promove Timoroan Iha Industria Filme

Dili International Film Festival (DIFF) kuntinua apoio no promove Timoroan ne’ebe iha abilidade atu produs filme hodi involve iha industria filme, tanba ne’e kada tinan DIFF sempre halo kompetisaun ba filme lokal sira.

Diretora DIFF, Lena Lenzen hateten kada tinan sempre raliza kompitisaun ba filme lokal iha Timor-Leste hodi dezenvolve historia no promove turismo no kultura Timor nian ba mundo.

“Tanba ne’e kada tinan DIFF halibur ema iha industria filme husi nasaun seluk hodi bele mai halo treinamento hodi promove Timoroan iha industria filme no oinsa atu halo filme ne’ebe mak tuir historia Timor nian,” Diretora DIFF Lena Lenzen hateten.

Nia dehan, antes ne’e DIFF kapasita ona feto Timor oan hamutuk nain 20 oinsa atu produs filme konaba situasaun feto iha Timor.

“Tinan ne’e ita loke tan kompetisaun ba filme lokal badak ba Timoroan sira ho nia tema konaba oinsa adapta an ba mudansa iha Timor-Leste,” nia hateten.

Nia dehan, filme sira ne’ebe mak hatama ona hodi tuir kompetisaun ba DIFF, sei ba publika mos iha Australia hodi hatudo ba mundo.

“DIFF kontinua apoio formasaun hodi promove Timorona iha industria filme hodi produs rasik filme badak tuir kriatividade husi arte, musika, hodi produs sai filme,” nia dehan.

Tanba ne’e nia dehan, iha Timoroan barak mak iha kriatividade no intersante los atu halo filme hodi konta tuir historia antigo ne’ebe mak Timor iha tanba ne’e DIFF nafatin apoio.

Iha fatin hanesan, Lauredo Nobel da Paz Doutor Jose Ramos Horta hateten, inisiativa ne’e diak oinsa atu bele involve produtor no ator Timoroan sira liu husi festival DIFF nian.

“Hau husu mos labele halo deit festival ba filme deit, maibe ba mos musika no kultura nian tuir identidade Timor nian,” Horta husu.

Nia dehan, festival ne’e involve regiaun barak no liu husi festival ne’e hakarak hatudo naran, tanba ne’e tenke hanoin didiak saida mak atu halo hanesan filme festival direito humanos, meio ambiente no buat seluk tan.

“Hau hare iha tinan ne’e diak liu fali tinan kotuk. Hu hare iha mudansa ona ba filme lokal sira,” maibe tanba sitausaun COVID-19 mak difikulta,” nia hateten.

Tanba ne’e nia dehan, ne’e pasu importante ba kuntinuasaun atu bele lori Timor ba mundo internasional liu husi filme festival ne’e rasik, tanba Timor iha jeito ne’ebe diak ba sinema.

Iha parte seluk ator filme Zelia Ximenes agradese tebes tanba bele partisipa iha festival DIFF nian nune’e bele koñese tan ator sira husi nasaun seluk no bele foti mos ema nia esperiensia konaba produsaun filme.

“Hau nia esperansa ba future, Dili International Filme Festival bele la’o nafatin ho diak hodi promove nafatin ami liu-liu ba feto Timoroan atu dezenvolve nafatin talento ne’ebe mak iha konaba produsaun filme,” nia dehan.

Tanba ne’e, nia husu ba kolega feto sira labele tauk atu koko no fahe nafatin esperiensia ne’ebe iha area film maker nain.