Sidadaun Estrangeiro Ne’ebe Visto Mate Iha EE Governo Konsidera Valido Nafatin

Sidadaun estrangeiro iha Timor-Leste, ne’ebe nia visto mate durante implementasaun estadu emergensia (EE), governo konsidera valido nafatin, no sei la selu multa tanba bazeia ba lei migrasaun ho dekreto governo fo ona autorizasaun.

Diretor Serviso Migrasaun, Superientendente Xefe Agostinho Gomes hateten, tuir lei migrasaun ho azilio numero 11/ 2017, no bazeia ba dekreto governo numero 12/2020, fo ona lisensa ba visto no dokumento seluk ne’ebe mak mate durante periodo estado emergensia, no la konsege sai husi teritorio, ne’e valido nafatin.

“Ita lahalo prosesu, no la aplika selu multa ba sira tanba situasaun,” DG Migrasaun Gomes hateten.

Tanba ne’e nia dehan, durante implementasaun estado emergensia maske sira nia visto mate no la halo atualizasaun maibe fo liberdade ba sira.

“Bainhira iha identifika sidadaun estrangeiro ne’ebe mak nia visto mate iha implementasaun estado emergensia, ita aplika isensaun koima signifika la selu koima ka multa,” nia informa.

Maibe nia dehan, karik identifika mak visto mate antes de estado emergensia faze primerio no mos iha fulan julhu tanba la aplika estado emergensia, servisto migrasaun nafatin prosesu no aplika multa.

Enkuanto nia dehan, sidadaun estrangeiro sira ne’ebe mak iha Timor-Leste dadaun komposto husi nasaun 28.

Entretanto, Diretor FONGTL, Daniel Santos hateten, liga ba implementasaun estado emergensia governo labele aplika multa ka prosesu sidadaun estrageiro sira ne’ebe iha Timor-Leste, tanto sira ne’ebe serviso no turista sira.

“Tanba ita hare iha dekreto lei governo ne’ebe mak iha liga ba estado emergensia ne’e labele aplika multa, ka halo prosesu ba sira tanba ne’e la’os sira mak hakarak maibe tanba situasaun surto corona virus,” nia hateten.

Maibe despois de estado emergensia no sirkulasaun nasional no internasional livre ona mak sira kontra lei migrasaun nian ne’e obrigasaun tenke prosesu no aplika multa tuir krime ne’ebe mak nia halo.

“Atu nune’e ema nasaun seluk bele tauk atu kontra lei migrasaun nia ne’ebe mak eziste iha Timor. no bainhira tama teritorio tenke hakruk ba lei ne’ebe mak kesi ona sira nia ezistensia,” nia dehan.

Tanba ne’e nia dehan, dadaun ne’e fo liberdade ba sira, depois sirkulasaun nasional internasioanl livre ona serviso migrasaun tenke aplika serio duni lei migasaun nian ba sidadaun estrangeiro sira iha Timor-Leste.