KFP Haruka Fila Pedidu Ezonerasaun Husi Ministerio Balun

Komisariu Komisaun Funsaun Publika (KFP), Antonio Freitas informa KFP simu pedidu ezonerasaun kargu diresaun xefia no apontamentu kargu foun husi ministerio balun, maibe sira haruka fila tanba laiha justifikasaun ne’ebe klaru kona ba razaun legal hodi ezonera.

Nia dehan, ema ne’ebe tur iha kargu diretur jeral, diretur nasional no xefe departamentu sira ne’e selesaun pur meritu, no tuir lei sira nia mandatu tinan hat (4), maske sira bele hetan ezonerasaun bainhira sira iha sala tuir lei funsaun publika nian.

“Kualker ministru ida atu hato’o pedidu oficial ezonerasaun kargu diretur jeral, diretur nasional, xefe departamentu sira, tenke justifikadu razaun fundamentu tuir lei, laos tuir dalan politika. Komisaun Funsaun Publika firme desizaun katak kualker desizaun ezonerasaun kuandu laiha justifikasaun ami haruka fila,” nia hateten iha servisu fatin Matadoru, Dili.

Nia dehan, tuir dekretu lei no 25 hateten kualker pedidu atu halo ezonerasaun kargu no funsionario tenke iha justifikasaun ne’ebe klaru tuir lei tanba ho ida ne’e mak bele garante sustentabilidade administrasaun publika.

Nia hatutan, ba funsionario sira ne’ebe sente la satisfas ho desizaun ruma iha adminsitrasaun publika iha direitu atu hato’o rekursu internal ba ministerio, ba komisaun, no bele ba tribunal tanba lei fo dalan.

Nia dehan, fulan hira liu ba iha pedidu lubun ida husi governante sira atu halo ezonerasaun no komisaun aprova pedidu ida rua ne’ebe ho justifikasaun klaru, maibe barak laiha justifikasaun motivu ezonerasaun entau haruka fila.

Iha parte seluk, Komunidade Jose Amaral husu KFP atu fo atensaun seriu ba problema ida ne’e atu garante neutralidade no imparsial iha administrasaun publika.

“Situasaun ida ne’e sei la motiva ema atu servisu ho profesionalismu tanba desizaun sira ne’e perturba ema nia psikologia, liu-liu sira ne’ebe servisu mandatu seidauk termina ezonera husi kargu sein justifikasaun,” nia hateten.

Nia espera, komisaun funsaun publika bele halao knar ho neutru tuir baze legal ne’ebe iha atu garantia sustentabilidade administrasaun publika hodi servi povu.