- Publika iha: 02 Setembro 2020
Sekretaria Estado Arte no Kultura (SEAK) dezenvolve ona abrigo (2) iha kapital Dili laran sai fatin turismo historiku tanba uluk fatin refese sai abrigo iha tempo rezistensia.
Sekretario Estado SEAK, Teofilho Caldas hateten tuir dekreto lei numero 33/ 2017 rejime juridiku patrimonio kultural nian koalia mos konaba protesaun prezervasaun, salva guarda ba fatin historiku sira, atu komunidade sira bele konhese no valoriza patrimonio historiku.
“SEAK, dezenvolve ona fatin historiku rua iha Dili laran hanesan iha Kakaulidun no Lahane sai ba fatin turismo nune’e vizinante sira bele halo vizita,” nia dehan.
Nia haktuir katak iha programa VIII governo, SEAK iha kompetensia hodi identifika fatin historiku sira hodi halo prezervasaun no dezenvolve sai fatin turismo.
“Ita iha kompetensia atu halo prezervazaun hodi dezenvolve fatin abrigo sira ne’e sai fatin turismo historiku,” SEAK Caldas hateten.
Nia dehan, governo sei nafatin esforso hodi halo nafatin identifikasaun ba fatin historiku sira seluk iha rai laran nune’e bele dezenvolve ba fatin turismo hodi atra vizinate nasional no internasional sira bele halo vizita.
Iha parte seluk, Diretor Ezecutivo FONGTL, Daniel Silva hateten fatin historiku iha Timor laran ne’e barak tanba ne’e governo tenke identifika hodi bele dezenvolve fatin sira ne’e sai fatin turismo nune’e bele fo hanoin jerasaun foun sira konaba akontesimento iha pasado nian.
“Fatin historiku hanesan abrigo ka subar fatin, nune’e mos patrimonio Portugal nian ne’ebe mak at ona, governo tenke halo rehabilitasaun ka halo konstrusaun hodi dezelvolve ba fatin turismo,” nia dehan.
Maibe nia haktuir, fatin historiku balun lapresija halo konstrusaun foun, maibe tenke rahabilita deit nune’e labele halakon dezenu original, no mos balun ne’ebe presija konstrusaun foun governo tenke investe osan.
“Fatin historiku sira ne’e governo mak hadia diak, ne’e bele atrai ema estrangeiro sira nian matan sira bele mai vizita, no ita bele hatama osan ba kofre estado liu husi fatin turismo sira ne’e,” nia hateten.
Tanba ne’e nia hateten, fatin historiku ne’e governo tenke dezenvolve atu nune’e husi historia ne’ebe mak akontese iha fatin refere labele lakon no tenke kuntinua konta husi jerasaun ba jerasaun tanba historia mak kultura Timor nian.