SEJD Tenki Retender Fila Fali Konstrusaun Estadiu Munisipiu Dili

Governu Timor-Leste liuhusi Sekretaria Estadu Joventude no Desportu (SEJD) desidi atu loke retender ba konstrusaun estadiu munisipiu Dili tanba kompanhia lokal ne’ebe kaer projetu abandona tiha ona.

Tuir Sekretariu Estadu SEJD, Eng. Abrão Nokosiku Saldanha, konstrusaun refere hahú iha 2015 husi kompaña lokál total osan hamutuk milhaun 1,5 dolares amerikanu.

“Ami sei buka fali empreza foun hodi konstrui obras estadiu munisipiu Dili tanba seidauk selu hotu. Tenke resolve uluk tuan depois halo fali levantamentu nia restu ne’e para tau fali osan. Estadiu ne’e agora dadauk halo hela diskusaun oinsa mak osan restu ne’e bele hahu fali retender para kontinua finaliza tia obra ne’e estadiu, ne’ebe foin atinji 73%. Osan restu $400,000 hanesan atu finalize,” nia dehan.

Hatutan sekretariu estadu katak, ba retender ida ne’e uza fali osan original kontratu nia, maibe sei halo diskusaun hamutuk ho governu, e nomós kompanhia sira.

“Tenke uza osan ida original kontratu nian. Ida ne’e mak sei hare hamutuk ho governu tomak atu rezolve tanba iha problema legal. Legal ida kobransa ida agora iha dadauk ne’e, maibe sei diskuti ho kompanhia ho governu para buka solusaun ba ida ne’e,” nia dehan.

Entretanto, Presidente Joventude Hadomi Desportu (JHD), Francisco Lopes haktuir tan estadiu Dili seidauk finaliza agora ne’e. Ne’e problema ka sala governu tanba governu mak nain ba projetu ne’e tuir lolos governu iha poder husu ba kompanhia ne’ebé kaer obra estadu para aselera lalais servisu ne’e.

“Ne’ebé hau hanoin senti sala ne’e mai husi ita nia governu, ne’ebé problema ne’e iha governu nia liman liu-liu Sekretario Estadu Joventude no Desportu, nia fo tekanan ida ba emprezariu ne’e para empreza aselera lalais obra ne’e,” nia salienta.

Nia esklarese tan katak obra ne’e hahu kedas tinan 2015 maibe ate adata estadiu la hotu, lampu seidauk monta.

“Estadiu ne’e iha Sekretaria Estadu [SEJD] nia liman foti asaun imediata para bele resolve para finaliza lalais estadiu Dili ne’e. Ba Joventude Hadomi Desportu nia hanoin mak ne’e diak liu sekretariu estadu hare tok empreza la finaliza ona obras ne’e diak liu buka fali empreza seluk para bele finaliza lalais obras ne’e, para estadiu ne’e ema bele uza liu-liu ema sira ne’ebé hadomi desportu,” nia hatutan.

Nia esplika tan katak tanba agora dadaun hein Copa FFTL, depois liga futebol Timor-Leste, maibe kampu seidauk prontu.