- Publika iha: 21 Julho 2016
Membru Parlamentu Angelina Rangel lamentavel ho servisus Instituisaun Jestaun Ekipamentus (IJE) ne’ebe durante ne’e ladun hala’o nia funsiona ho diak.
Nia lamentavel, tanba estrada ligasaun husi munisipiu Baucau ba Lospalos aat tebes, lolos ne’e IJE nia responsabilidade hodi hadia netik, se karik Parlamentu Nasional seidauk aprova orsamentu.
“Tau mina ba para hadia estrada sira ne’e, liu-liu iha parte Laga, Laivai to’o tama iha Lospalos,” nia kestiona, iha Parlamentu Nasional.
Tuir lolos, nia dehan, estrada ne’ebe aat ho grau ne’ebe ki’ik no governu seidauk atu bele hadia, ne’e papel IJE nian atu haree ba kestaun sira ne’e, hodi nune’e komunidades iha area rural ne’e bele asesu oituan ba estrada ne’ebe diak antes governu ba hadia.
“Hein los deit ne’e ita bele sofre tinan barak ba estrada aat sira ne’e,” nia hateten.
Hatan ba kestaun ne’e Ministru Obras Publiku, Transportes no Komunikasaun (MOPTK), Gastao Sousa, hateten konstruksaun estrada husi Baucau ba Lospalos agora dadaun iha hela faze konkursu ho orsamentu husi imprestimu ADB nian.
“Iha tinan ida ne’e bele implementa ona projetu ne’e,” nia hateten.
Nia dehan, estrada Baucau-Lospalos la presiza atu uza IJE, maibe karik estrada seluk governu presiza hanoin ona oinsa atu funsiona IJE ne’e.
“Ne’e hanoin diak ida ne’ebe mak ita presiza atu haree,” nia dehan.
Iha parte seluk komunidade Eduardo Martins, hateten problemas kona ba estradas nunka rezolvidu husi tinan ba tinan, maske kada tinan parlamentu aprova orsamentu ba estrada nian.
“Tinan-tinan ita sempre fakar osan ba hadia estrada, maibe estrada kontinua aat,” nia kestiona.