- Publika iha: 03 Maio 2016
Diretor Nasional Empregu iha Sekretariado Estado Politika Formasaun Profesional e Empregu (SEPFOPE), Paulo Alves, hateten trabalhador Timor oan nain 100 resin mak oras ne’e dadaun ho status illegal hela iha Korea do Sul.
Nia dehan, trabalhador sira ne’e illegal tanba sira nia durasaun hela iha Korea do Sul kompleta ona tinan lima, maibe sira lakohi fila no balun komete irregularidade (liga ho kontratu).
“Ita iha trabalhador 100 resin mak illegal no komete irregularidade iha Korea do Sul,” Diretor Alves hateten, iha nia knar fatin Kaikoli, Dili.
Nia dehan, husi numeru ne’e iha balun mak deporta ona, tanba Polisia Imigrasaun Korea do Sul konsege kaer sira, maibe maioria sei iha ne’eba.
Nia informa, SEPFOPE koalia ona ho adidu sira iha Korea hodi trata asuntu ida ne’e ho husu trabalhador sira ne’ebe durasaun hela remata ona atu fila ba Timor.
“Korea do Sul rai bo’ot e adidu nain rua deit, orsamentu la sufsiente atu fasilita servisu adidu nian,” nia dehan.
Nia informa, trabalhador sira ne’ebe komete irregularidade, hetan black list e labele tama fali ona ba iha Korea do Sul.
Entretantu Vise Prezidente Komisaun D (dezenvolvementu e ekonomia), Deputadu Domingos Carvalho de Araujo, hateten SEPFOPE nia responsabilidade mak identifika joven sira ne’e no haruka fila, labele husu deit.
“Labele husik deit sira hanesan ne’e, tenke buka tuir ema sira ne’e haruka fila tanba sira mak haruka ba sira tenke responsabiliza,” nia hateten.
Nia dehan, adidu sira tenke identifika trabalhadores ne’ebe komete irregularidade no krime iha ema nia rain, haruka sira fila antes polisia kaer, tanba ladiak ba Timor –Leste bainhira nia ema komete krime iha ema nia rai.
Kona ba trabalhadores ne’ebe tempu hotu ona, maibe sira hakarak servisu iha ne’eba tenke informa adidu no SEFOPE, nune’e bele buka solusaun, labele halo desizaun mesak.