- Publika iha: 18 Abril 2016
Komandante Jeral Polisia Nasional Timor-Leste (PNTL), Komisariu Julio Hornai, hateten iha tinan 2016 ne’e governu liu husi Ministeriu Interior sosa tan motorizada hamutuk 257 hodi distribui ba Ofisial Polisia Sukus (OPS) hodi fasilita sira nia servisu iha baze diak liu tan.
Nia hateten, iha tinan 2014 governu sosa ona motorizadas hamutuk 26 hodi oferese ba OPS sira hodi halo’o servisu iha baze e iha 2016 governu sosa tan 257motorizadas .
“Ohin ami entrega 257 e falta 60 ne’ebe sei entrega iha tempu badak,” Komisairu Hornai hateten, iha Dili.
Alende ne’e, nia dehan, oferese mos radio komunikasaun hamutuk 155 inklui laptop hamutuk 170.
Hornai mos husu ba membrus polisia (feto no mane) sira atu servisu maka’as no diak liu tan hodi garantia seguransa iha rai laran.
“Kontinua garante servisu ho kualidade ba ita nia sidadaun sira hodi kontribui ba paz no liberdade iha teriotoriu tomak,” nia hateten.
Iha okaziaun ne’e, nia mos husu ba OPS sira atu utiliza faslidade hirak ne’e ho kuidadu no responsablidade, tanba sasan hirak ne’e sosa uza povu nia osan.
Iha parte seluk Deputada Anna Ribeiro, rekonese katak iha 2016 ne’e Parlamentu Nasional konsege aprova duni osan hodi sosa motor ba OPS sira, tanba knar OPS importante tebes.
“Ita tau osan hodi sira sosa motor ba polisia OPS sira, atu nune’e hafasil sira nia servisu,” nia dehan.
Maibe, nia husu, ba OPS sira hakbesik no kolabora ho komunidade sira iha baze, hodi komunidade sente ambiente amizade ho autoridade seguransa sira.