Quarta, Fevereiro 19, 2025

Reprezentante United Nations Population Fund (UNFPA) iha Timor-Leste Domingas Bernardo dehan, tuir peskiza demográfika saúde Timor-Leste husi tinan 2016 ne'e feto no labarik-feto iha munisípiu Lautém husi tinan 15 to'o 49 anos iha 38% mak sofre ona violénsia.

Reprezentante United Nations Population Fund (UNFPA) iha Timor-Leste Domingas Bernardo dehan, tuir peskiza demográfika saúde Timor-Leste husi tinan 2016 ne'e feto no labarik-feto iha munisípiu Lautém husi tinan 15 to'o 49 anos iha 38% mak sofre ona violénsia.

Nia dehan, feto no labarik-fetohirak ne’e sofre violénsia hanesan, violénsia fiziku, seksuál ho emosionál hahú husi tinan 2016.

"Ita haree tuir peskiza demográfika saúde Timor-Leste nian husi tinan 2016 iha Munisípiu Lautém 38% feto no labarik-feto ho idade 15 to'o 49 sira esperiénsia ona violénsia fíziku, seksuál ho emosionál," nia informa.

Nia dehan, husi númeru 38% ne'e, kazu ida ne'ebé sériu tebes,tanba hatudu prevelensia ne'ebé aás tebes iha Timor no inklui mós iha Munisípiu Lautém.

"Persiza ita hotu nia servisu hamutuk no asegura prevensaun no resposta ne'ebé efetiva ba Violénsia Bazeia ba Jéneru iha Munisípiu Lautem," nia esplika.

Nia informa, UNFPA kontinua esforsu hodi servisu hamutuk ho Ministériu Saúde nomos parseiru sira hotu, hodi servisu makaas atu elimina violénsia hasoru feto no labarik feto sira iha Munisipiu hotu-hotu.

Iha parte seluk Komandante Polísia Munisípiu Lautém, Superintendente João da Costa dehan, PNTL luta nafatin hodi fó sosilizasaun ba komunidade kona-ba Violénsia Bazeia ba Jéneru nian, maibé hotu-hotu tenke esforsu hodi kombate violénsia hasoru feto no labarik iha Munisípiu Lautém.

"Ita luta no esforsu nafatin, maibe labele hein PNTL de'it,maibé intedade hotu mai ita esforsu hamutuk hodi kombate númeru Violénsia Bazeia ba Jéneru, tanba númeru ne'e hatun persiza ita hotu nia servisu no kooperasaun," nia saliente.

Nia informa, Polísia Nasionál Timor-Leste (PNTL) husu ba entidade hotu atu nafatin iha polítika ida halo diseminasaun lei ne'e ba iha komunidade hotu para hatene.

"Sei ita nível leten maka hatene de'it lei ne'e, maibé komunidade ne'ebé iha postu, suku no aldeia laiha koñesementu ba lei ne'e ita defisil tebes ita atu kombate Violénsia Bazeia ba Jéneru ne'e rasik," Komandante Polísia Munisípiu Lautém Superintendente Costa informa.

Nia dehan, tanba ne'e komunidade presiza entende di'ak kona-ba lei krime públiku nian nune'e bele hado'ok an husi violénsia no entidade hotu iha obrigasaun hodi hala'o nia knaar hodi halo prevensaun liuhusi promove diálogu ba komunidade sira.