- Publika iha: 04 Dezembro 2024
Autoridade Munisípiu Díli husu governu tenke hasai regulamentu ida hodi regula komunidade sira hakoi mate iha uma-hun atu bele halo prevensaun ba saúde públika.
Prezidente Autoridade Munisípiu Díli Gergorio Saldanha hatete, atu regula rate sira iha kapitál Díli tantu públiku no rate sira komunidade hakoi iha uma-hun governu presiza halo regulamentu ida hodi regula.
Nia dehan, iha Munisípiu Dili rate públiku iha lima, no rate família sira nian ne’ebé hakoi, Autoridade Munisípiu Díli identifika rate hamutuk 30-resin.
"Ita husu governu atu halo regulamentu ida hodi regula hakoi mate sira iha rate sira-ne'e, nune'e mós regula komunidade sira ne’ebé hakoi mate iha uma-hun," nia dehan.
Nia dehan, hakoi mate iha uma-hun ne'e hatudu katak implikasaun ba saúde ema sira ne’ebé sei moris ne'e nian.
"Komunidade sira ne'ebé hakoi mate iha uma-hun nune'e regulamentu sei manda, no mate ne'e medida hira no kee rai kuak medida hira, oinsá rate sira-ne'e ba oin halo oinsá, maibé regulamentu iha hotu," PAM Díli Saldanha hatete.
Nia informa, sei iha opsaun oinsá mate sira ba hakoi apropriadu no governu prepara regulamentu sira atu nune'e komunidade sira kumpri regulamentu sira ne'e, atu nune'e AMD supende komunidade sira hakoi mate arbiru iha kintal laran no uma sorin.
Entertantu Ministru Administrasaun Estatal Tomas Cabral dehan, risku ba Saúde Publika husi semetiru sira husi fatin ema hakoi mate no sei impaktu saúde ba komunidade sira ne'ebé hela besik rate.
"Durante ne'e ita seidauk halo avaliasaun barak, mIbé ha'u agradese Prezidente Autoridade Munísipiu Díli tanba hola inisiativa ida atu kria regulamentu ba rate sira no hakoi mate iha uma-hun," nia hatete.
Nia dehan, inisiativa di’ak tebes husi Prezidente Autoridade Munísipiu Díli nian atu nune'e bele organiza komunidade sira ho didi'ak bainhira hakoi mate.