UN Women Apoiu PNTL Promove Servisu Polisiamentu Sensível Ba Jéneru

UN Women Timor-Leste Apoiu Polísia Nasionál Timor-Leste (PNTL) hodi promove servisu Polisiamentu Sensivel ba Jéneru iha instituisaun no foka ba iha komunidade lokál.

Reprezentante UN Women iha Timor-Leste Nishtha Satyam dehan, apoiu ne’e liuhusi lansamentu Planu Estratéjia Jéneru daruak tinan (2024-2028), ho objetivu hasa'e partisipasaun feto hodi promove Servisu Polisiamentu Sensível ba Jéneru iha instituisaun.

"UN Women apoiu Polísia Nasionál Timor-Leste PNTL hodi promove servisu Polisiamentu Sensivel ba Jéneru iha instituisaun no foka ba iha komunidade lokal, tanba ita hare feto Polísia maioria iha kapasidade lideransa di’ak tebes," nia hatete iha serimónia selebrasaun loron Nasionál feto iha Comoro.

Nia dehan, tenke promove instituisaun ida ne'ebé iguál, diversifikadu no inkluzivu liutan, no hametin servisu polisiamentu ne’ebé Sensivel ba Jéneru.

"UN Women dedikadu atu fó apoiu ba Polisia Nasionál Timor-Leste nian iha sira-nia viajen atu sai instituisaun ida ne'ebé iguál liu tan ba jéneru. Evidensia hatudu ho klaru katak, iha feto barak liu iha liña frente hetan konfiansa husi sivil sira. Dokumentu ne'e trasa enkuadramentu estratéjiku ba implementasaun polisiamentu ne'ebé sensível ba jéneru, pasu krusiál ida hodi hametin modelu polisiamentu komunitáriu ne'ebé efetivu liu," nia hatutan.

Nia hatete, PNTL halo ona progresu sira hodi promove igualdade jéneru liuhosi implementasaun Estratéjia Jéneru dahuluk (2018-2022). Maibé, feto sira ladún hetan reprezentasaun iha pozisaun aas sira. Feto sira iha de'it pursentu 15 hosi forsa polisia iha 2022, no sira iha de'it pursentu 10 hosi ofisiál sira ho pozisaun aas liu. Aleinde ne'e, feto sira ladún hetan reprezentasaun iha papél operasionál no espesializadu sira.

Entretantu Xefe Gabinete Igualidade Jéneru iha PNTL Inspetora Maria Fatima Martins dehan, Estratéjia Jéneru ba tinan 2023-2028 nian ne’e iha objetivu rua primeiru hasa'e partisipasaun lideransa feto polísia hodi promove instituisaun igualdade no inkluzaun, segundu hametin Polisiamentu komunitáriu hodi Sensivel ba Jéneru.

"Ita hatene katak, oinsa hasa'e kapasidade institusionál hodi hadia liutan abordajen jéneru hodi promove igualdade no inkluzaun iha PNTL nia laran," nia saliente.

Nia dehan, mós ho apoiu UN Women nian espera katak bele promove liu tan servìsu fatin ne’ebé seguru ho respeita igualdade privasidade ema ida-idak nian.

Enkuantu nia garente, ho Estratéjia Jéneru ne'e aliña ho PNTL nia Dekretu Lei sira no Planu Estratéjia (2023-2028), nomós Planu Asaun Nasionál daruak 1325 Timor-Leste nian kona-ba Feto, Pás no Seguransa (2024- 2028) kona-ba promove feto sira-nia partisipasaun igual no envolvimentu tomak iha esforsu hotu-hotu hodi harii pas ne'ebé sustentável iha rai laran.