Quinta, Julho 18, 2024

Sekretária Estadu Igualdade (SEI), Elvina Sousa Carvalho informa, feto potensiál hamutuk nain 241 ka 11% mak kandidata aan hodi kompete ho mane sira iha eleisaun lideransa komunitária períodu 2023-2030.

Sekretária Estadu Igualdade (SEI), Elvina Sousa Carvalho informa, feto potensiál hamutuk nain 241 ka 11% mak kandidata aan hodi kompete ho mane sira iha eleisaun lideransa komunitária períodu 2023-2030.

Nia dehan númeru ne’e hatudu katak feto sira iha interese atu sai lideransa lokál, liu-liu xefe suku no xefe aldeia inklui estruktura suku tomak, tanba sei iha delegada-delegadu no reprezentante joventude feto no mane.

“Inisiu ha’u hateten ona katak, númeru feto ne’ebé kandidata aan sei aumenta, no barak mak sei hetan konfiansa, tanba iha ona prova hatudu feto ne’ebé eleitu sai xefe suku no xefe aldeia iha períodu sira liuba halo servisu di’ak tebes.

Sira dezempeña sira-nia papel ho di’ak tebes, ne’e hatudu liuhusi sira hetan prémiu hanesan rekoñesimentu la’ós tanba feto, maibé sira lider komunitária ne’ebé di’ak hodi inspira feto seluk no komunidade atu fó konfiansa ba feto sira lidera suku,” nia hateten hafoin partisipa enkontru Konsellu-Ministru, iha Palácio do Governo, Díli.

Nia hateten kandidatu sira-ne’e mai ho nivel edukasaun ne’ebé lahanesan ho kareira ne’ebé diferente tebes, maibé ida-ne’e la’ós kestaun bo’ot importante hatudu sira-nia kapasidade no abilidade lideransa mak povu sei fó konfiansa.

Nia hatutan SEI aloka ona fundu ba Asosiasaun Feto Pontensiál Munisípiu sira ho montante $4,000 até $5,000 kada munisípiu no apoia mós Organizasaun Sosiedade Sivíl sira ho montante $20,000 até $22,000hodi fó formasaun no kapasitasaun prepara feto potensiál sira no enkoraja sira kandidata aan iha eleisaun suku.

Sekretária Estadu optimista eleisaun lideransa suku períodu tinan 2023-2030, sei iha númeru xefe suku eleitu feto aumenta, tanba dadaun ne’e iha de’it nain 21 husi 452 xefe suku.

Entretantu, Prezidente Asosiasaun Feto Pontensial Munisípiu Baucau, Regina de Sousa hateten munisípiu Baucau iha suku hamutuk 59 no feto nain 25 mak kandidata aan ba xefe suku.

“Iha Baucau feto 25 pessoas mak kandidata aan, hanesan iha postu Bagia na’in tolu, Laga na’in 2, Venilale na’in neen, Quelekai na’in neen, Vemasse na’in 2 no Baucau Villa na’in lima,” nia hateten.

Iha parte seluk, Diretór Organizasaun Movimentu Feto Foinsa’e Timor-Leste (MOFFE-TL), nu’udar mós membru ekipa feto prontu lidera, Yasina Lujina hateten sira sei apoia kampaña ba kandidata sira nian tantu kampaña direita no indireita husi plataforma sosial media sira atu dada votus.

“Sira iha tempu ona tama iha kampaña, entaun suporta ne’ebé ita bele oferese ba sira mak liu-liu agora ami fasilita halo publikasaun ba kandidata sira-nia profile liuhusi sosial media, radio komunidade no televizaun sira atu komunidade no públiku koñese sira,” nia hateten.

Aleinde ne’e sira mós apoia dezenvolve kandidata sira-nia vizaun no prioridade ne’ebé atu halo bainhira eleitu hodi hato’o iha kampaña.

Nia hatutan sira mós sei halo observasaun ba prosesu eleisaun iha sentru sira ne’ebé iha kandidata feto sira.