- Publika iha: 28 Junho 2023
Membru Parlamentu Nasional, Deputada Maria Fernanda Lay, husi Bankada Conselho Nacional de Resistência Timorense (CNRT) eleita nu’udar ba Prezidente Parlamentu Nasionál períodu 2023-2028, ho votu a-favor 45, abstensaun 19, kontra 0 no votu branco 1.
Prezidente Parlamentu Nasionál sesante V Lejislatura, Deputadu Aniceto Longuinhos Guterres Lopes hateten iha istória Timor-Leste, primeira feto kaer kargu nu’udar Prezidente Parlamentu Nasionál, titulár segundu orgaun soberania.
“Nune’e, rezultadu mak ne’e Deputada Maria Fernanda Lay eleita ba Prezidente Parlamentu Nasionál. Primeira muller timorense eleita nu’udar Prezidente Parlamentu Nasionál, titular de orgaun de soberania. Tanba ne’e parabéns ba Prezidente Parlamentu Nasionál foun, destinta deputada Maria Fernanda Lay no parabéns ba feto Timoroan no parabéns ba povu Timor-Leste tomak,” nia deklara rezultadu votasaun iha plenária abertura Sesta Lejislatura iha Parlamentu Nasionál, Dili.
Nia hateten knaar dirije meza termina ona, entaun Prezidente Parlamentu Nasionál foun, Deputada Maria Fernanda Lay mak assume knaar hodi kontinua ajenda to’o enserramentu ba plenaria.
Entretantu, Prezidente Parlamentu Nasionál eleita, Deputada Maria Fernanda Lay hateten, agradese ba prezidente partidu CNRT ho estruktura no prezidente partidu PD ho estrutura hamutuk ho militante hotu ne’ebé fo fiar hodi lidera Parlamentu Nasionál.
Nia dehan lejislasaun VI ne’e simu naha todan tanba tenke konsolida hikas instrumentu legál sira atu responde ba ezijénsia povu nian.
“Ha’u komprometidu sei fó kontinuidade ba servisu sira ne’ebé hala’o ona husi Prezidente Parlamentu sesante, sei mantein komunikasaun ho sira. Ha’u mós sei dere bankada ida-ida nia odamatan no deputadu/a sira ida-idak hodi konsolida di’ak liutan funsionamentu orgaun legislativu ida-ne’e. Parlamentu Nasional aleinde tenke sai orgaun povu nian, iha fatin ida-ne’e duni ita hotu sei dignifika orgaun legsilativu ho produtu lejislasaun no polítika ne’ebé aposta ba dezenvolvimentu inkluzivu,” nia hateten.
Nia garantia no fiar hamutuk ho deputadu no deputada na’in 64 sei hala’o mandatu tuir konstitusaun haruka nu’udar lejisladór, feskalizadór no desizaun polítika sira.
Nia mós husu apoia husi komunidade Parlamentu Nasionál tomak atu servisu ho didikasaun, badinas no profesionál serbí povu no nasaun ida-ne’e.
Nia hateten sei mantein relasaun di’ak ho governu, sosiedade sivíl, institusaun média no grupu parlamentu país sira seluk hanesan CPLP no seluk tan ne’ebé iha kooperasaun.
Iha parte seluk, Deputada Maria Teresa da Silva Gusmão hateten orgullu tebes ba feto Timor-Leste tanba hetan fiar lidera orgaun soberanu ida.
“Hanesan feto, orgullu tebes no ida-ne’e hatudu katak demokrasia iha Timor-Leste mais avansadu tanba fó ona fatin ba feto tuur iha altu nivel lidera meza orgaun soberanu ida ne’ebé aas mós iha Timor-Leste,” nia hateten.
Tuir observasaun TDW iha terenu nota katak feto potensiál ne’ebé eleita iha VI lejislatura nu’udar membru Parlamentu Nasionál hamutuk na’in 23 ka 35% husi totál total membru 65.