Sexta, Junho 14, 2024
Total visitors: 766366

Eleitór Feto, Idelta Rodrigues iha esperansa ba partidu vensedor ne’ebé sei forma governu foun mai sei promove reprejentasaun feto ne’ebe kualidade iha strutura governasaun dala sia nian, iha nivel parlamentu nasionál no iha nivel municipal tanba feto barak iha nivel edukasaun aas, iha esperensia bo’ot, maibe laiha oportunidade.

Eleitór Feto, Idelta Rodrigues iha esperansa ba partidu vensedor ne’ebé sei forma governu foun mai sei promove reprejentasaun feto ne’ebe kualidade iha strutura governasaun dala sia nian.

Nia dehan durante tinan 21 independensia, partisipasaun feto iha vida politika diak tebes, ne’ebe hatudu liu husi reprejentasaun feto iha parlamentu nasionál dadaun ne’e 40% husi 65 kadeiras. Maibe iha nivel governu, municipal no suku numeru ki’ik tebes.

“Hau nia apelu ida ba governasaun ida mai importante tebes atu promove feto sira ho kualidade, hau hanoin feto barak mak oras ne’e dadaun iha esperansia barak, hasai estudu barak iha nivel edukasaun ne’ebe diak. Nune’e atu hili ema karik hili ema ne’ebe iha kapasidade, iha esperensia, iha kibi’it, iha espesialidade ba area ida ne’e atu dezenvolvimentu ne’ebe sei lori atu hadia povu nia moris ba moris diak bele konkretiza tuir mehi ne’ebe ema hotu hakarak hetan,” nia hateten hafoin ezerse nia direitu votu iha sentru votasaun Eskola Sekundariu 10 Dezembru Comoro, Dili.

Nia hateten feto hotu-hotu hakarak reprejentasaun feto iha formasaun governu pelumenus atinji 30% tanba feto barak iha kapasidade, abilidade ba area oioin, entau tenke fo espasu ba sira atu hatudu sira nia dezempeña hodi kontribui buat ruma ba rai ida ne’e.

Nia mos espera maluk feto sira ne’ebe hetan fiar husi partidu politiku vensedor sira tur iha parlamentu no governu bele lori aspirasaun feto no sidadaun sira hotu nian, liu-liu sidadaun vulneravel sira.

Entertantu, Votantes Manuela da Silva Tilman espera governasaun foun mai ne’e sei garantia oportunidade ne’ebe balansu entre feto no mane iha formasaun governasaun no membru parlamentu nasionál.

“Nudar Feto iha esperansa bo’ot tebes ita nia Vitoria mosu mai ona hakarak tenke iha balansu entre feto no mane tanba feto no mane iha dirietu hanesan, ne’ebe garantia iha konstitusaun, entau tenke asegura balansu iha nivel hotu hahu husi leten to’o kraik,” nia hateten.

Entretantu, Diretóra Ezekutivu Fundasaun Alola, Maria Imaculada Guterres espera governu foun mai nafatin konsidera asuntu igualidade jeneru no inkluzaun hanesan prioridade atu kontinua aloka fundus hodi hakbi’it ekonomia feto no empodera feto sira iha area oioin.

“Iha mos kontinuasaun kapasitasaun ba lideransa feto sira, oinsa involve feto iha nivel foti desizaun nian, ne’e importante tanba durante ne’e ita menus tebes iha nivel municipal nian. Karik governu foun mai sei bele tau prioridade aas ba involvimentu feto iha nivel foti desizaun iha nivel municipal, no parte governasaun no parlamentu hanesan kouta 30%, ita espera ida ne’e lao,” nia hateten.

Nia espera governu foun mai sei fo atensaun makas liu tan ba edukasaun ba feto foinsa’e sira no empoderamentu ba feto tanba feto iha nivel edukasaun ne’ebe aas no independente finanseiru sei bele kontribui diak liu tan ba familia no nasaun.