- Publika iha: 26 Abril 2023
Ministra Ministerio Negósiu Estranjeiru no Kooperasaun (MNEK), Adaljiza Albertina Xavier Reis Magno hateten inisiativa estabelese sala ka fatin espesifiku fó susu atu inan sira depois lisensa maternidade fulan tolu tama fali servisu bele kontinua fó susu sira-nia bebé iha tempu oras servisu tanba rekomendasaun saúde bebé moris eskluzivamente fó de’it inan nia susuben to’o fulan neen.
Nia salienta governu bele halo alterasaun ba lei atu hasa’e loron lisensa maternidade husi fulan tolu ba fulan neen, maibé sei presiza tempu halo diskusaun tanba ne’e alternativu ida mak kria sala fó susu iha edifisiu sira atu fasilita inan sira fó susu sira-nia bebé.
“Ita hotu hatene katak ita nia lei fó de’it tempu ba inan sira lisensa maternidade fulan tolu, maibé tuir sujestaun husi saúde nian katak fulan neen ne’e tenke dedika eskluzivamente hodi fó susu ba bebé sira. Ita hotu hatene katak Timor-Leste, enfrenta problema bo’ot nutrisaun. Dalan ida atu hadia nutrisaun ba labarik sira mak husi inisiu kuandu bebé foin moris fó kedas susuben inan nian tanba haree ba esperiénsia labarik barak lahetan susuben husi inan no estadu la insentiva hodi kria kondisaun di’ak atu sira fó susuben eskluzivu fulan neen nian, entaun ami mai ho inisiativa ida halo sala ida ba inan sira-ne’ebé partu hotu ona fila mai servisu bele fó susu sira-nia oan iha edifisiu,” nia hateten hafoin partisipa iha kampaña nasionál susuben inan no lansamentu sala fó susu iha MNEK Pantai Kelapa, Díli.
Nia dehan ho kondisaun ida-ne’e mak bele suporta feto sira-nia kareira profesionaál tanba sira bele servisu ho hakmatek no bebé sira mós lalakon sira-nia direitu atu hetan susuben husi sira-nia inan.
Nia hateten iha nasaun barak edifisiu sira tantu públiku, privadu oferese fatin fó susu ba inan sira atu fó susu sira-nia bebé iha oras balun nia laran. Iha Timor-Leste, foin iha ajénsia UN sira mak promove ona sala ida-ne’e no ba edifisiu públiku úniku MNEK mak iha ona espasu fó susu bebé.
Nia informa funsionáriu iha MNEK, pursentajen menus husi 50% mak feto, no feto balun okupa kargu diresaun xefia tanba ne’e iha servisu ne’ebé barak atu halo.
Iha parte seluk, Ministra Saúde, Doutora Odete Maria Freitas Belo apresia ho inisiativa polítika husi MNEK nian ne’ebé estabelese fatin fó susu no sala ida ba labarik sira deskansa iha edifisiu atu fasilita inan fó susu tanba dezafiu ida ba inan sira atu kontinua fó susu sira-nia bebé to’o fulan neen mak bainhira fila ba servisu.
Nia dehan rekomendasaun saúde nian bebé foin moris mai fó susuben inan nian de’it to’o fulan neen. Depois fulan neen bele fó hahan nutritivu seluk no kontinua fó susu to’o bebé idade tinan rua.
“Ida-ne’e inisiativa di’ak ida ba ministériu hotu, ami espera katak ami segundu ministériu ne’ebé tenke prepara,” nia hateten.
Nia konsente espasu sai hanesan problema, maibé sira iha parseru ne’ebé hakarak apoia fasilidade sira atu estabelese sala fó susu iha edifisiu Ministériu Saúde.