Domingo, Abril 21, 2024
Total visitors: 766366

Prezidente Repúblika Demokrátika Timor-Leste (RDTL), Jose Ramos Horta dehan instituisaun Polísia Nasionál Timor-Leste (PNTL) tenke promove igualdade jéneru no promove feto sai komandante.

Prezidente Repúblika Demokrátika Timor-Leste (RDTL), Jose Ramos Horta dehan instituisaun Polísia Nasionál Timor-Leste (PNTL) tenke promove igualdade jéneru no promove feto sai komandante.

Nia dehan, durante ne’e iha PNTL la fó importánsia hodi promove igualdade jéneru nune’e mós la fó oportunidade ba feto sai komandante, maioria ne’e mane, feto mínimu liu.

“Husu Komandu Polísia Nasionál Timor-Leste (PNTL) tenke promote igualdade jerenu liu-liu koloka feto sai komandante nune’e bele sai ezemplu ba instituisaun seluk,” PR Horta dehan iha Serimónia Aniversáriu PNTL badala 23 iha Bairu-Pite.

Nia dehan, ezisténsia PNTL badala 23 ona, maibé kompostu husi komandante Esquadra, Munisípiu to’o Komandante Jerál ne’e maioria okupa husi mane, feto menus liu, ida-ne’e signifika katak implementasaun igualdade jéneru sei menus.

“Tuir ha’u-nia haree durante ne’e polísia feto ne’ebé sai komandante hodi lidera komandu ne’e na’in-rua de’it mak hanesan, Komandante Munisípiu Díli, no Komandante Munisípiu Liquiçá,” nia hatete.

Tanba ne’e husu atu fó oportunidade ba polísia feto sira atu bele ba tuir kursu nune’e bele promove sira hanesan mós ho polísia mane sira, labele hamoru diskriminasaun.

Iha fatin hanesan, Komandante Jerál Polísia Nasionál Timor-Leste (PNTL) Komisáriu Henrique da Costa dehan, dadaun ne’e feto ne’ebé sai Komandante Esquadra, Komandante Munisípiu no okupa kargu Xefia sira hamutuk na’in 73.

“Ita sempre apoiu sira ba eskola maijór nian, maibé depende ba proposta ne’ebé mak parseriu sira haruka mai, karta ne’ebé mak sira haruka mai ne’e Timor hetan oportunudade ba ema ida ka rua tuir diviza ne’ebé sira iha la’ós ita mak hili,” nia hatete.

Maibé nia dehan, komandate nafatin esforsu atu bele promove di’ak liutan igualdade jéneru iha instituisaun seguransa tuir ema hotu nian hakarak.

“Iha ha’u-nia mandantu ha’u sita mós prioridade ba igualdade jéneru maibé atu promove di’ak liutan presiza parseru relevante sira-nia kuntribuisaun,” Komisáriu PNTL Costa Saliente.

Nia dehan, komandu sei esforu hodi fó oportunidade ba feto polísia nune’e bele partisipa iha formasaun sira atu nune’e bele aumenta tan sira-nia kapasidade hodi lidera atu nune’e sai komandante karik sira preparadu hotu ona hein halo servisu deit.