- Publika iha: 14 Abril 2023
Diretór Servisu Munisípal Jestaun Merkadu no Turizmu, iha Munisípiu Díli, Arthur Henriques informa servisu manutensaun ba fasilidade jardin públiku sei sentraliza iha Ministériu Turismu Komersiu Indústria (MTKI) seidauk desentraliza mai iha munisípiu tanba ne’e sira laiha kondisaun atu halo manutensaun ba jardin sira iha sidade Díli.
Nia salienta durante ne’e sira kooperasaun ho parseru organizasaun internasionál balun, ajénsia no kompaña balun mak apoia hala’o atividade ki’ik sira hanesan loke feira, formasaun ba negosiante sira kona-ba kulinária no iha mós manutensaun ba jardin balun.
“Ami laiha kondisaun atu halo manutensaun ba jardin sira-ne’e, tanba até agora MTKI seidauk intrega kompeténsia tomak ba ami atu halo kontrolu. Maibé ami halo kooperasaun ho parseiru sira hanesan Hineken, Mercy Crop, USAID hodi halo manutensaun ba jardin Farol no jardin BJ Habibi uza produtu resiklajen halo baner tau iha pasajen sira iha ne’ebá, ne’e ami halo,” nia hateten iha servisu fatin Matadoro, Díli.
Nia konsiente kondisaun fíziku jardin sira hanesan jardin Motael, jardin 5 de maio, jardin Largo Lecidere, jardin Bebora, jardin mandarin ne’e presiza halo manutensaun ba lampu sira maioria la funsiona, hariis fatin la funsiona no sistema bee sira avaria hotu.
Iha parte seluk, Presidente Eletrisidade de Timor-Leste, Empreza Públika (EDTL, E.P), Paulo da Silva hateten sira-nia knaar mak atu asegura sentral sira, rede transmisaun distribusaun no konesaun ba konsumedór sira, kona-ba eletrisidade iha jardin sira-ne’e servisu MTKI no administrasaun munisípiu nian.
Nia dehan foin lalais sira simu apoia solar street light unidade 500 husi kompaña Zamancartel Berhad husi Malaysia atu monta iha fatin sira-ne’ebé presiza hanesan parte tasi ibun pantai kelapa nian, entaun iha espasu balun ne’ebé presiza sei halo instalasaun.
“Ita haree lai jardin sira-ne’ebé bele ita tau, maibé normalmente servisu sira hanesan ne’e servisu institusaun ida-ida nian. Baut sira jardin no situ turístiku ne’e MTKI no administrasaun munisípiu ida-ida nian servisu, ne’e la’ós EDTL, E.P nia servisu,” nia hateten.
Nia hateten sei iha espasu balun parte tasi ibun sei nakukun tanba ne’e sira sei fó prioridade atu halo instalasaun solar iha fatin sira-ne’e atu fó naroman ba negosiante sira-ne’ebé halo negósiu iha tasi ibun tempu kalan.