- Publika iha: 11 Fevereiro 2023
Diretóra Ezekutiva NGO Forum Komunikasaun Ba Feto Timor Lorosa’e (FOKUPERS), Maria Fatima Pereira Guterres informa sira servisu hamutuk ho NGO Care Internasionál fasilita formasaun orsamentu sensivel jenéru ba funsionariu autoridade protesaun sivil sira atu iha koñesementu hodi asegura alokasaun orsamentu ne’ebé benefisia ba feto no mane.
Nia dehan informasaun no komprensaun pesoal autoridade protesaun sivil sira nian ba orsamentu sensivel jenéru ne’e importante tebes tanba feto, labarik no grupo vulneravel sira mak dalabarak sai vitima ba situasaun emergensia sira ne’ebé akontese.
“Iha servisu protesaun sivil nian situasaun balun ita bo’ot sira hasoru inan feto sira, inan isin rua sira, labarik sira no ema ho defisiénsia. Hakarak lakohi iha servisu ami nian liga ho asuntu direitu umanu feto nian no ami mos sei liga ho kestaun umanidade ne’ebé liga mos ho servisu protesaun sivil nian,” nia hateten bainhira partisipa iha abertura formasaun OSJ ba autoridade protesaun sivil iha salaun FOKUPERS Farol, Dili.
Nia hateten formasaun ne’e sei halao durante loron tolu husi loron 8 to’o 10 fulan febreiru, ne’ebé fasilitador sira sei sai husi instituasaun relevante sira hanesan ministériu finansas koalia konaba alokasaun orsamentu jeral estadu.
Entertantu, Prezidente Autoridade Protesaun Sivil, Superintendente Polísia, Ismael da Costa Babo hateten asuntu igualidade jenéru, liu-liu protesaun ba feto, labarik no grupo vulneravel sira sai prioridade ida tanba ne’e apela ba komandu munisípiu sira atu integra asuntu ne’e iha planu emegensia nian.
“Protesaun sivil past parte iha institusaun ida ne’ebé halo kampañia makas ba protesaun feto, labarik no grupo vulneravel ema ho defisiénsia no idozu sira. ita bo’ot sira akompañia situasaun ne’ebé akontese tiha ona. Feto, labarik no ema defiseniensia sira ne’e prioridade ita tenke integra iha ita nia planu emergensia, hakarak lakohi labele diskrimina ita nia vitima no populasaun sira sai husi ita nia planu, responde no apoia,” nia hateten.
Iha parte seluk, Country Coordinator, iha NGO Care Internasional, Maqsood Kabir hateten formasaun ne’e importante tebes ba funsionariu kargu xefia sira atu bele iha abilidade halo advokasia ba alokasaun orsamentu kada tinan nian.
“Atividade protesaun sivil iha politika ne’ebé inklusivu, entau formasaun ne’e haforsa ita bo’ot sira nia kapasidade hanesan matadalan no influensiadór iha plataforma inkluzaun nian, liu husi luta ba orsamentu ne’ebé sensivel ba jenéru,” nia hateten.