Sábado, Março 25, 2023
Total visitors: 733242

Diretóra Ezekutivu NGO Fundasaun Alola, Maria Imaculada Guterres informa iha fulan janeiru tinan 2023, sira refere tan pasiente kankru susun nain tolu husi munisípiu Bobonaro, Manatutu no Ataúro mai Hospital Nasionál Guido Valdares (HNGV), Dili atu hetan tratamentu.

Diretóra Ezekutivu NGO Fundasaun Alola, Maria Imaculada Guterres informa iha fulan janeiru tinan 2023, sira refere tan pasiente kankru susun nain tolu husi munisípiu Bobonaro, Manatutu no Ataúro mai Hospital Nasionál Guido Valdares (HNGV), Dili atu hetan tratamentu.

Nia salienta bazeia rezultadu konsulta ho mediku sira iha hospital nasionál, hatudu pasiente nain tolu ne’e ho kondisaun grave, signifika tama ona iha stadiu 3 no 4 tanba ne’e nain rua haruka fila ba uma no nain ida kontinua tratamentu iha hospital. Pasiente nain ida husi nain rua ne’ebé haruka fila ba uma mate ona.

“Binhira ami lori pasiente ba hospital doutor sira hare foti lima ona haruka sira fila, entau ami bolu fali sira nia familia mai iha ne’e ou ami ba tuir sira nia uma lori ho pakote ne’e hanorin sira oinsa hamos kanek lorloron atu labele hamosu iis, nune’e familia sira bele besik tau matan ba pasiente,” nia hateten iha servisu fatin Maskarinhas, Dili.

Nia dehan manejamentu kazu kankru iha rai laran seidauk maximu, liu-liu servisu paleativus nian tanba durante ne’e pasiente sira ne’ebé mai ho stadiu avansadu 4, mediku sira haruka fila ba uma no dalabarak familia diskrimina pasiente sira tanba kondisaun kanek ne’e hamosu iis makas.

Nia konsiente governu halo ona esforsu atu estabelese servisu kuidadu tersiariu ba moras kankru nian iha hospital nasionál tanba iha ona preparasaun fasilidade, rekursu humanu no ekipamentu. Maibe presiza mos reforsa atividade sensibilizasaun edukasaun prevensaun ba kankru, liu-liu promove stilu moris saúdavel ba komunidade no enkoraja komunidade halo ezaminasaun baziku ba isin lolon atu halo deteksaun sedu.

Nia haktuir hahu tinan 2014 to’o mai inisiu 2023, sira refere ona pasiente sira ne’ebé deskonfia kankru susun hamutuk 225. Husi numeru ne’e nain 10 resin positivu sofre kankru susun, no nain 3 husi nain 10 mate ona.

Iha parte seluk, Mediku Cirugia Jeral, iha Hospital Nasionál Guido Valdares, Arcanjo de Jesus Sequira Nunes hateten dadus estatistika real lorloron nian hatudu moras kankru aumenta, liu-liu kankru tee oan, kankru susun no kankru postata tanba numeru media 30 kada fulan.

Nia dehan pasiente sira ne’ebé aprezenta aan mai hospital nasionál 80% ho stadiu avanadu, entau solusaun ne’ebé fo invazivu tebes halo pasiente sira sente tauk tanba operasaun ne’ebé halo tenke hasai hotu susun no halo limpeza iha parte kalilin.

“Presiza halo estudu ketak ida tanba sa mak pasiente sira mai tarde. Maibe ita bele suspeita katak bele sosio kultural no ambiente nian katak sira moe aprezenta aan sedu ba kualker fasilidade saúde, segundu influensia giografika hela distansia do’ok no afetasaun ekonomia ne’ebé ladun favorese ba sira atu hakbesik aan ba sentru deteksaun primaria sira atu bele transfere mai iha hospital nasionál,” nia hateten.

Nia hateten modalidade tratamentu ba kankru nian mak halo operasaun, kemoterapia no radioterapia. Maibe tratamentu ne’ebé HNGV bele oferese mak operasaun deit tanba foin halo esforsu atu hari departamentu oncologia hodi estabelese servisu tratamentu ba oncologia nian.