- Publika iha: 25 Janeiro 2023
Koordenadór Jerál Organizasaun Joven iha Veterinária (JOVET), Abrão Pereira hateten sira servisu hamutuk ho Asosiasaun Alumni Bolseiru Australia (TL3A) realiza formasaun ba joven feto iha veterinária kona-ba abilidade dezenvolve setár veterinária nian no promove importansia feto nia papel iha setór ida-ne’e.
Nia dehan sira kolabora ona ho governu no parseru balun atu realiza atividade komunitária iha Munisípiu balun, liu-liu fó edukasaun hasa’e konsiénsia públika kona-ba importansia setór veterinária no atendimentu saúde ba animál sira.
“Ita bo’ot sira hatene área ida ne’ebé mak la’ós iha Timor-Leste de’it, maibé iha fatin barak dominadu husi mane sira. Entaun ita hanoin katak ho programa sira formasaun ne’e oinsa ita promove mós feto nia importansia iha área veterinária nian,” nia hateten hafoin partisipa iha Formasaun kona-ba kapasitasaun no promosaun igualdade jéneru iha profisaun saúde animál nian
Nia hateten JOVET nu’udar fatin ida ba joven sira ne’ebé hasai estudu iha área veterinária nian atu buka aprende no reforsa sira-nia kapasidade no abilidade iha siénsia prátika molok tama iha kampu servisu tuir sira-nia estudu durante iha universidade.
Nia haktuir dadaun ne’e Timor-Leste foin iha médiku veterinária hamutuk na’in 20 no para veterinária barak tanba universidade iha rai-laran loke ona departamentu saúde animal nian.
Iha parte seluk, Estudante Departamentu Saúde Animal, iha Universidade Nacional Timor Lorosa’e (UNTL), Novia Benga Laga Vian hateten prezensa JOVET nian nesesáriu tebes atu iha fatin ida ba sira aprende hariku sira-nia kapasidade no abilidade prátika iha área veterinária.
Nia dehan veterinária setór prinsipál ida ba dezenvolvimentu sosiu-ekonomia povu nian, maibé governu seidauk halo investimentu ida ne’ebé adekuadu atu dezenvolve setór ida-ne’e sai bo’ot.
“Dala barak ita hatene iha área veterinária no agirkultura ema sempre refere liuba ferik no katuas sira. Entaun ho programa ne’e bele muda ema nia hanoin tanba joven iha papel importante tebes iha ita-nia nasaun,” nia hateten.
Nia enkoraja joven sira labele sente moe hala’o atividade haki’ak animál no husu governu atu iha insentivu ruma ba grupu joven sira hala’o atividade veterinária hodi asegura produsaun produtu animál atu responde ba seguransa aihan no nutrisaun.