Quinta, Dezembro 08, 2022
Total visitors: 692025

Adjunta Reprezentante UNFPA, iha Timor-Leste, Doutora Domingas Bernardo hateten rezultadu peskiza isin rua adolexente no kaben sedu iha Timor-Leste tinan 2017, indika katak joven feto 19% kaben molok iha idade tinan 18 no 24% iha ona oan ida bainhira sira to’o tinan 20.

Adjunta Reprezentante UNFPA, iha Timor-Leste, Doutora Domingas Bernardo hateten rezultadu peskiza isin rua adolexente no kaben sedu iha Timor-Leste tinan 2017, indika katak joven feto 19% kaben molok iha idade tinan 18 no 24% iha ona oan ida bainhira sira to’o tinan 20.

Nia salienta estudu ne’e deskobre feto adolesente sira ne’e kaben no isin-rua sedu tanba menus informasaun kona-ba saúde reprodutivu no seksuál, nune’e lori konsekuénsia laiha poder atu rezeita relasaun ne’ebé saudável, kestaun seluk mak kondisaun ki’ak sai mós fatór ida ne’ebé kontribui makas ba feto adolexente sira kaben no isin rua iha idade minoridade.

“Tanba sira laiha oportunidade estudu no servisu, entaun opsaun ba feto sira mak kaben ou forma família iha idade ne’ebé minoridade. Tanba ne’e importante tebes atu iha aprosimasaun integradu ne’ebé ita prioritiza asesu joventude nian ba edukasaun no servisu,” nia hateten bainhira halo enkontru ho Jornalista sira iha Kampaun UN Caikoli, Díli.

Nia dehan dadaun ne’e Ministeriu Edukasaun Joventude no Desportu (MEJD) iha polítika ida bolu polítika fila hikas ba eskola, maibé realidade feto barak iha ona oan para ona eskola tanba preokupa ho sira-nia família.

Nia hateten rezultadu peskiza ne’e mós hatudu maioria kazu sira ne’e nia situasaun mak sira isin-rua uluk, hafoin ba kaben tanba ne’e presiza planu integradu hodi halo intervensaun ba prevenesaun nian.

Nia hatutan UNFPA kontinua halo diskusaun ho governu kona-ba alokasaun orsamentu ba populasaun joven sira atu iha alokasaun orsamentu ne’ebé adekuadu ba programa no servisu sira empoderamentu ba foinsa’e, liu-liu feto sira.

Iha parte seluk, Ministra Saúde, Dotora Odete Maria Freitas Belo hateten edukasaun no informasaun kona-ba saúde reprodutivu no seksuál la’o hela iha fasilidade saúde nível báziku hanesan postu saúde no sentru saúde komunitária sira, maibé presiza reforsa no intensifika liután atividade sira ne’e ba adolesente sira atu iha informasaun ne’ebé loos no klean hodi hola desizaun ba sira-nia moris.

“Bainhira ita kaben iha idade ki’ik, entau frekuensia relasaun seksual aas. Ne’ebé risku ba hetan moras kankru tanba kaben sedu sira nia orgaun seidauk prontu, la hatene oinsa kuidadu aan rasik no oan sira, entau afeta ba sira nia saúde,” nia hateten.

Nia hateten feto sira ne’ebé isin-rua iha idade menus husi 20, risku ba hetan moras komplikasaun aas hanesan anemia ou ran menus, malnutrisaun, ne’ebé tau sira no sira-nia oan iha risku ba mortalidade.