Quinta, Dezembro 08, 2022
Total visitors: 692025

Sekretária Estadu Igualidade no Inkluzaun (SEII), Maria do Rosário Fátima Correia hateten servisu advokasia ba partisipasaun feto iha lideransa hatudu progresu di’ak, maibé presiza luta nafatin atu iha partisipasaun ne’ebé hanesan entre feto no mane.

Sekretária Estadu Igualidade no Inkluzaun (SEII), Maria do Rosário Fátima Correia hateten servisu advokasia ba partisipasaun feto iha lideransa hatudu progresu di’ak.

Nia salienta progresu ne’ebé atinji mak reprezentasaun feto iha parlamentu nasionál atinji 40% ou na’in 26 husi 65 membru parlamentu. Iha nível governu 15% ou na’in 6 husi 43 membru governu, nível munisípiu menus tebes prezidente autoridade feto na’in-ida de’it husi 13 munisípiu no nível suku atinji 5% ou na’in 21 husi suku 442.

“Selebrasaun loron nasionál feto tinan ne’e ho tema feto prontu lidera atu kontinua fó hanoin ba ita hotu katak feto sira prontu ona lidera tanba sira lidera tiha ona hamutuk ho mane sira iha tempu luta ba libertasaun no kontinua lidera fó kontribuisaun ba ukun aan. Maibe ita mós hatene katak sei iha feto barak presiza espasu hodi haberan sira-nia matenek,” nia hateten iha selebrasaun loron nasionál feto ba dala 46, iha CCD, Díli.

Nia dehan tinan 2023, sei iha eleisaun rua mak elisaun parlamentár no eleisaun suku. Lei eleisaun parlamentár garantia kouta 30% ba feto nia partisipasaun tanba ne’e sira hamutuk ho organizasaun feto sira halo hela advokasia ba partidu polítiku sira atu fó espasu ba feto sira tama iha lista númeru 1 no 2.

Nia hateten evidénsia globál no iha Timor-Leste rasik hatudu feto nia lideransa iha mudansa no transforma sosiedade ne’ebé progresivu no inkluzivu, liu-liu kontinua halo esforsu hamenus no halakon norma sosiál sira ne’ebé limita feto nia partisipasaun.

Enkuantu, Prezidente Parlamentu Nasionál, Deputado Aniceto Longuinhos Guterres Lopes hateten atualmente reprezentasaun feto iha parlamentu na’in 26 no sira-nia partisipasaun ativu tebes iha debate sira.

“Imi akompaña debate sira ne’e iha TV mane sira ladun ativu, so feto sira. Hein katak asentu parlamentár ne’ebé kada legislatura aumenta sei motiva ita-nia feto sira hodi empodera liután inan feto sira-nia partisipasaun,” nia hateten.

Iha parte seluk, Feto Potensiál, Alzira Reis hateten partisipasaun feto iha lideransa nível nasionál iha mudansa, maibé nível lokál sei presiza reforsa makaas liután.

Nia dehan tinan 2023, sei iha eleisaun parlamentár no suku nian tanba ne’e advokasia labele foku de’it ba partisipasaun feto iha nível altu, liu-liu parlamentu tenke hakbi’it mós feto potensiál sira iha nível lokál no enkoraja sira kandidata aan ba xefe suku.

“Ha’u-nia esperansa bo’ot katak festa demokrasia ne’ebé sei akontese iha tinan oin, sei promove di’ak liután feto nu’udar eleitora no feto pontesiál sira ne’ebé hakarak atu sai lideransa ne’e tenke haforsa liután sira,” nia hateten.

Nia hateten partidu polítiku sira iha papel importante atu hakbi’it feto sira-nia kapasidade no abilidade lideransa atu prepara sira sai lideransa ne’ebé di’ak no maduru.