- Publika iha: 18 Novembro 2022
Diretóra Ezekutivu AcBit, Manuela Leong Pereira hateten feto sobrevivente konflitu passadu 1975-1999, liu-liu vítima violasaun seksuál barak kondisaun moris vulnerável tebes tanba sofre moras oioin laiha kbi’it atu hadia moris.
Nia salienta governu iha programa oioin atu apoia família kbi’it laek sira hanesan uma ba kbi’it laek, subsídiu terseria idade, apoia pontuál ba sobrevivente sira, bolsa da mãe, maibé implementasaun mosu diskriminasaun bo’ot ba feto sira.
“Barak sei terus, ekonomikamente hanesan uma aat, laiha apoia ida ba sira, liu-liu sira vítima violasaun seksuál familia deskrimina sira, idade ferik ona, kondisaun moras, uma laiha, rai laiha,” nia hateten iha Salaun Katedral, Díli.
Nia dehan tenke iha polítika espesífiku ida haree ba feto sobrevivente konflitu passadu tanba sira nia terus la hanesan, sira kontinua hetan diskriminasaun no violénsia oioin iha sira-nia moris.
“Ami-nia luta agora ne’e mak oinsá iha polítika espesífiku, hanesan atribuisaun uma kbi’it la’ek mós tenke iguál ba feto no mane,” nia hateten.
Nia hatutan sira mós kontinua aprosima sobrevivente sira atu partisipa iha formasaun abilidade moris no mikroempreza atu sira bele sobrevive sira-nia moris tanba sira barak sei trauma lakohi sobre sai sira-nia aan iha públiku.
Nia informa tinan tolu ikus ne’e, sira konsege fó ona formasaun ba sobrevivente konflitu passadu no sobrevivente violénsia bazeia jéneru atuál hamutuk na’in 1,269. No ajuda sira forma grupu negósiu atu sira bele iha rendimentu.
Iha parte seluk Diretór Ezekutivu Centro Nacional Chega! Institutu Públiku (CNC, I.P), Hugo M. Fernandes hateten programa reparasaun sira servisu hamutuk ho liña ministériu no organizasaun sosiedade sivil sira, liu-liu tratamentu saúde no empoderamentu ekonomia sobrevivente sira-nian.
Nia dehan hahú tinan 2019, Ministériu Solidaridade Sosiál no Inkluzaun (MSSI), liuhusi programa pagamentu pontuál aloka orsamentu $80,000 kada tinan hodi halo pagamentu ba sobrevivente na’in 150. Kada sobrevivente ida hetan $500.
“Ita iha programa reparasaun ne’ebé mak iha komponente bo’ot rua mak ida relasiona ho tratamentu saúde nian no rekuperasaun ekonomia sobrevivente sira-nian,” nia hateten.
Nia hatutan sira mós koopera ho Ministériu Administrasaun Estatal (MAE) atu atribui mós uma kbi’it laek ba sobrevivente sira.