Quinta, Dezembro 08, 2022
Total visitors: 692025

Diretór Jerál Ministériu Solidaridade Sosiál no Inkluzaun (MSSI), Rui Manuel Gago Expostu hateten sira esforsu buka dalan seluk atu halo pagamentu ba benefisiáriu sira iha munisípiu Ainaro, Bobonaro no Rejiaun Administrativa Espesiál Oé-cusse Ambeno (RAEOA) tanba sidadaun barak mak laiha konta bankária.

Diretór Jerál Ministériu Solidaridade Sosiál no Inkluzaun (MSSI), Rui Manuel Gago Expostu hateten sira esforsu buka dalan seluk atu halo pagamentu ba benefisiáriu sira iha munisípiu Ainaro, Bobonaro no Rejiaun Administrativa Espesiál Oé-cusse Ambeno (RAEOA).

Nia salienta, sira halo ona koordenasaun ho Ministériu Justisa, liu-liu diresaun jerál notariadu atu fasilita benefisiáriu sira hetan kartaun Billete Identidade (BI), maibé iha limitasaun ba atendimentu iha nível munisípiu no postu-administrativu sira.

“Ita iha ona akordu ho BNCTL atu halo pagamentu, maibé iha posibilidade buka ajénsia seluk ne’ebé responsabiliza ba pagamentu bele rezolve lai hodi hein benefisiáriu sira trata sira-nia (BI) atu sira bele loke sira-nia konta bankária,” nia hateten iha Timor Plaza Comoro, Díli.

Nia hateten sira halo ona negosiasaun ho karteira elektronika T-pay husi Telkomsel no halo dikusaun ho agensia Telemor atu uza lai agensia sira ne’e halo pagamentu ba benefisiariu sira tanba sira mak hetan ona sertifikadu husi banku central atu halo pagamentu sira.

Nia haktuir, tuir dekretu lei númeru 22/2021, 10 novembru, subsídiu ba inan isin rua no bebé idade 0 to’o tinan 6 ne’e, ho karakter universál, maibé la’ós obrigatóriu. Signifika família sira ne’ebé sente iha kapasidade bele rezeita subsídiu ne’e.

Diretor Jeral Expostu hatutan valor transferensia mak subsidiu $15 dolar amerikanu kada fulan ba inan isin rua, $20 dolar amerikanu ba bebé foin moris to’o idade tinan 6. No iha montante adisionál ba labarik sira ho kondisaun defisiénsia $10 kada fulan, signifika labarik ne’ebé ho idade defisiénsia sei hetan $30 dolar kada fulan.

Nia haktuir orsamentu 2022, aloka $7 milliaun no governu Austrália apoia fundu milliaun $5 ba implementasaun programa iha munisípiu tolu Ainaro, Bobonaro no RAOA. Iha tinan 2023, governu propoin tan orsamentu atu habelar programa bolsa da mãe jerasaun foun ne’e ba munisípiu haat tan mak Liquiçá, Covalima, Manatuto no Viqueque.

Iha parte seluk, Reprezentante UNICEF, iha Timor-Leste, Bilal Aurang Zeb Durrani hateten investimentu ba programa sira hanesan Sesta Bázika, bolsa da mãe no merenda eskolar ne’e importante tebes, maibé presiza mós supervizaun no monitorizasaun di’ak atu intervensaun sira ne’e foku ba inan isin rua no kosok oan sira to’o idade tinan 2.

“Importante tebes atu komprende katak ita hakarak redús ra’es badak ka malnutrisaun krónika ba labarik sira iha Timor-Leste. Ita tenke foku ba intervensaun loron 1000 dahuluk moris nian, katak hahú inan isin rua to’o labarik selebra aniversáriu ba tinan rua,” nia hateten.

Nia dehan UNICEF servisu iha área save lima mak saúde maternu infantíl, nutrisaun, bee, saneamentu no ijiene, asesu edukasaun ba sira ne’ebé iha eskola no sira ne’ebé la iha eskola.