Sexta, Dezembro 09, 2022
Total visitors: 692386

Mediku Psiquiatra iha Sentru Aguda Hospital Nasional Guido Valdares (HNGV), iha Dili, Edmundo Monteiro informa husi fulan Janeiru to’o Julho tinan 2022, rejistu kazu tentativa oho aan ka suisidiu hamutuk feto nain 17, tanba hetan presaun makas ligadu ho problema moris familia nian.

Mediku Psiquiatra iha Sentru Aguda Hospital Nasional Guido Valdares (HNGV), iha Dili, Edmundo Monteiro informa husi fulan Janeiru to’o Julho tinan 2022, rejistu kazu tentativa oho aan ka suisidiu hamutuk feto nain 17.

Nia salienta sidadaun sira ne’e ho idade 16 ate 44, sira maioria forma ona uma kain ou kaben nain tanba ne’e sira iha problema familia, liu-liu problema ho laen, no mos ekonomia uma laran sai mos fator ida.

“Ita tenke hatene katak sira foti desizaun atu halo atentadu suisidiu ne’e hanesan buat ida karik ita bolu dehan sira lakohi atu mate. Maibe ida ne’e hanesan xamada atensaun sira hakarak atu ema rona sira nia halerik tanba sira halo ida ne’e atu dada ema nia atensaun ruma ne’ebe lao lalos iha familia laran,” nia hateten iha servisu fatin Bidau, Dili.

Nia dehan asaun ida ne’e hanesan xamada ida atu dada ema nia atensaun, maibe mos ema sira ne’ebe foti ona asaun tenta oho aan ne’e bele repete asaun ne’ebe sira halo ba dala barak to’o balun ne’ebe mate duni, katak la konsegue salva.

Nia hateten kazu tenta oho aan ne’e kategoria kazu emergensia tanba ne’e tenke baixa hodi bele hetan tratamentu medikamentu no akonselhamentu husi profesionais psikologu sira oinsa sira bele hasoru problema ambiente familia.

Nia hatutan feto iha tendensia hetan moras mental tanba fator barak, ida mak hormon, liu-liu depois partu posibilidade hetan depresaun no mos fator personalidade katak ema sira ne’ebe nonok deit, lakohi koalia sai sira nia sentimentu ne’e barak liu hanoin oho aan hanesan dalan ida.

Nia preokupa ho evolusaun prestasaun servisu kuidadu saúde mental ne’ebe seidauk fo atensaun maximu husi governu. Iha tinan lima mai governu sei hasoru dificuldade tanba numeru kazu moras mental aumenta no iha posilidade sa’e makas, maibe fasilidade internamentu sei limitadu tebes, rekursu humanu limitadu, no medikamentu laiha.

Iha parte seluk, Diretora Ezekutivu Organizasaun Movimentu Feto Foinsa’e Timor-Leste (MOFFE-TL), Yasinta Lujina hateten feto risku liu hetan moras mental tanba feto mak hetan presaun makas liu iha sosiedade no moris familia nian.

“Ita halo komparasaun entre feto no mane, dalabarak ema dehan feto mak risku tebes hetan moras mental tanba ita hatene moris familia, sosidedade dalabarak feto mak iha kondisaun ida hetan presaun makas, liu-liu iha moris familia no sosiedade. Ita rasik iha sosiedade hatur ona normas balun, limitasaun balun ba feto sira no obrigasaun balun ne’ebe ita hakarak feto sira tenke halo, ne’ebe dalabarak ita la aplika ba mane sira,” nia hateten.

Nia hateten feto sira hasoru situasaun oinoin iha moris familia no sosiedade nian no sira laiha abilidade atu jere sira nia kondisaun emosaun no la hetan tulun husi ema ruma entau dalabarak sira hili dalan oho aan.

“Hau hanoin baut ida ne’ebe ita hare barak liu mak kondisaun moris nian, ne’ebe make ma ida-ida hasoru lahanesan, liu-liu ita bele hateten kestaun moris ekonomia familia nian, nesesidade familia, uma laran ne’ebe obriga feto tenke hanoin no preokupa barak atu hare moris ida ne’e no koko buka meus oioin labele nafatin deside fali buat seluk,” nai haktuir.

Nia hatutan kestaun seluk ne’ebe feto sira hasoru iha sosiedade no familia mak violensia oioin hasoru feto sira hodi halo feto sira sente laiha valor, entau dalabarak hili dalan seluk.

Nia konsidera sosiedade nia konhesementu konaba problema mental sei minimu tebes tanba ne’e importante atu halo sensibilizasaun konsensia publika konaba problema mental no hasa’e abilidade sosiedade nian atu halo jestaun ba sira nia kondisaun emosaun no estabelese sistema atendimentu kuidadu saúde mental iha rai laran atu fo tratamentu ne’ebe dignu ba sidadaun sira ne’ebe iha problema mental.