Quinta, Dezembro 08, 2022
Total visitors: 692025

Ministra Ministerio Saúde (MS), Doutora Odete Maria Freitas Belo, hatete politika klaru iha planu stratejiku HIV/SIDA no STI hodi orienta profesional saúde sira halo screening teste Human Immunodeficiency Virus (HIV), Hepatitis B, no Sifilis, ba inan isin rua sira hotu ne’ebe visita fasilidade saúde hodi halo konsulta no teste ran atu deteta sedu karik pozitivu no proteje oan.

Ministra Ministerio Saúde (MS), Doutora Odete Maria Freitas Belo, hatete politika klaru iha planu stratejiku HIV/SIDA no STI hodi orienta profesional saúde sira halo screening teste Human Immunodeficiency Virus (HIV), Hepatitis B, no Sifilis, ba inan isin rua sira hotu ne’ebe visita fasilidade saúde.

Nia dehan inan isin rua ne’ebe moris ho virus HIV, maibe la hatene nia estatus no lahalo tratamentu terapia antiretroviral iha posibilidade bo’ot tebes transmite virus ne’e ba nia oan ne’ebe iha kanotak liu husi husar talin no dalan partu tanba virus ne’e moris iha ran.

Politika mos fo orientasaun hodi fornese tratamentu terapia antiretroviral ba inan sira ne’ebe konfirmadu positivu ba moras sira refere, tanba ne’e, enkoraja inan isin rua hotu tenke visita fasilidade saúde

“Ita iha aimoruk ne’ebe inan sira bele konsumu atu bele minimiza hada’et virus husi inan ba oan. Agora importante mak inan ne’e rasik tenke mai foti aimoruk, se inan ida sente nia aan afeta HIV, maibe la mai foti aimoruk ne’e sai problema,” nia hateten iha INS Comoro, Dili.

Nia hateten dezafiu bo’ot ne’ebe Timor-Leste enfrenta ba servisu kombate moras HIV/SIDA mak problema stigma no diskriminasaun hasoru maluk sira ne’ebe afetadu HIV/SIDA iha sosiedade sei aas. Konsekuensia mak sira la mai fasilidade saúde foti aimoruk kontinua halo hahalok sira ne’ebe risku hodi hada’et moras ne’e ba ema seluk inklui sira nia membru familia rasik.

Tuir dadus kumulativu tinan 2003 to’o fulan Junho 2022, total kazu hamutuk nain 1704, fahe ba kategoria grupo idade menus husi tinan 5 nain 51, idade tinan 6 ate 14 nain 18, idade tinan 15 ate 24 nain 461, idade tinan 25 ate 44 nain 1022, no idade mais tinan 45 ba leten nain 152. No husi total afetadu ho virus HIV, ema nain 271 mak mate ona.

Enkuantu, Vice Presidente Parlamentu Nasional, Deputada Maria Angelina Sarmento hateten Institutu Nasionál Kombate HIV/SIDA no MS tenke buka mekanismu sensibilizasaun ne’ebe efetivu atu bele konsiensializa ema hotu konaba moras HIV atu ema ida-ida bele kontribui ba prevensaun no hapara transmisaun iha sosiedade.

“Komisaun nasionál ida ne’ebe kombate HIV/SIDA ne’e tenke kontinua halo sosializasaun oinsa ema hases aan no prevene aan husi moras HIV tanba ida ne’e sai ameasa ba ita nia rai, liu-liu ita nia joven no labarik sira,” nia hateten.

Nia konsiente iha fator barak ne’ebe kontribui ba ema tantu feto no mane involve iha atividade sira ne’ebe risku ba sira hetan moras hada’et husi relasaun seksual inklui HIV, maibe importante ema sira ne’e tenke iha konesementu ne’ebe klean ba moras ida ne’e hodi bele uza meus preventivus atu evita hetan moras HIV ou hada’et moras ne’e ba ema seluk.

Iha parte seluk, Deputada Josefa Alvares Pereira hateten MS tenke iha politika konkretu ida foti asaun hasoru oknum profesional saúde sira ne’ebe fo sai ema nia estadu moras ba ema seluk no sira ne’ebe hasai linguajen afeta ema nia dignidade tanba ho ida ne’e mak ema ne’ebe afetadu bele hakbesik aan ba fasilidade saúde halo tratamentu hodi kontribui ba prevensaun transmisaun iha rai laran.

“Ema lakohi aprezenta aan ne’e laos tanba buat seluk, maibe ita lahatene rai ema nia segredu moras. Ita lori ema nia segredu ne’e ba espalha, entaun ema mos iha sentimentu lakohi ema atu hatene nia moras ikus mai sira prefere nonok to’o mate,” nia hateten.

Nia hateten sensibilizasaun informasaun ne’ebe lolos ba komunidade importante tebes atu konsiensializa ema ida-ida atu hado’ok aan husi hahalok risku sira tanba ema ida-ida mak bele kontrola aan.