Quinta, Dezembro 08, 2022
Total visitors: 692025

Organizasaun FairTrade servisu hamutuk ho Organizasaun Movimentu Feto Foinsa’e Timor-Leste (MOFFE-TL) realiza atividade graduasasun dahuluk ba formadu nain 20 husi programa Feto Eskola ba Lideransa iha Timor-Leste.

Diretora Ezekutiva MOFFE-TL, Yasinta Lujina, hateten ema nain 20 ne’e kompostu husi feto nain 17 no mane nain 3 ne’ebe sai formadu dahuluk ba programa refere.

Diretora Ezekutiva MOFFE-TL, Yasinta Lujina, hateten ema nain 20 ne’e kompostu husi feto nain 17 no mane nain 3 ne’ebe sai formadu dahuluk ba programa refere.

“Objetivu lolos husi programa ida ne’e mak ami hakarak atu ita nia maluk feto no joven feto sira bele foti knar lideransa ne’e tanba durante ne’e ita hatene koalia konaba lideransa mane mak domina, liu-liu iha sosiedade area rural,” nia hateten bainhira partisipa iha serimonia graduasaun ba partisipante sira iha salaun Delta Nova Comoro, Dili.

Nia hateten mekanismu Feto Eskola ba Lideransa ne’e intensivu, katak sira aprende iha aula depois tun ba komunidade halao atividade sira durante tinan ida nia laran.

Nia hatutan materia ne’ebe sira hetan iha aula mak konseitu direitu humanu, direitu feto, igualidade jeneru, lideransa, estratejia advokasia, jestaun projetu, dezenvolvimentu abilidade sira hansan fiar aan, koalia iha publiku, halo influensia no halo negosiasaun iha situasaun ne’ebe difisil.

Nia haktuir partisipante nain 20 ne’e nudar membru koperativa kafe iha munisipiu Aileu, Ainaro, Manufahi, Liquisa, Dili, no Manatutu.

Enkuantu, partisipante Madalena da Costa Soares hateten programa lideransa ne’e sai espasu ida ba feto agrikultor sira ne’ebe hela iha area rural atu aprende no kapasita aan sai lideransa.

“Feto Eskola ba Lideransa ajuda ona hau atu hare diferente iha hau nia aan no halo mudansa bo’ot ba hau nia konhesementu, komprensaun, hanoin, atetude sira. Agora hau prontu atu lidera no hatudu ba ema hotu katak hau ema ida ne’ebe iha direitu hanesan mos sira bele lidera.

“Hau agora lidera grupo hakiak ikan iha hau nia aldeia no halo mos atividade negosiu ki’ik sira,” nia hatete.

Iha parte seluk, Xefe Executivu FairTrade, Dr. Mike Briers AO, hateten program ne’e susesu tebes, liu-liu partisipante sira iha ona abilidade no kapasidade hahu dezenvolve atividade sira iha komunidade.

“Mana Madalena sei reprejenta Timor-Leste partisipa iha negosiu justu nia expozisaun kafe iha Melbourne, Australia. Hau espera katak ida ne’e esprensia diak ba ita bo’ot no iha buat ruma ne’ebe lori fila husi Australia mai fahe ba kolega sira iha Timor,” nia hateten.

Nia dehan sira iha komitmentu atu kontinua apoia programa ne’e iha Timor-Leste, liu-liu extende tan ba munsipiu seluk no dezenvolve tan programa sira iha nivel aas liu tan hanesan formasaun intensivu ba abilidade agro-ekonomia, empredorismu, agrikultura no seluk tan.