Partisipasaun feto nian sei menus iha prosesu rekrutamentu membru Falintil-Forsa Defesa Timor-Leste (F-FDTL) ba tinan 2022 nian.

Partisipasaun feto nian sei menus iha prosesu rekrutamentu membru Falintil-Forsa Defesa Timor-Leste (F-FDTL) ba tinan 2022 nian.

Portavoz F-FDTL, Kapitao Enjinhariaa Jose Antonio Nunes da Costa hatete iha prosesu rekrutamentu membru F-FDTL foun ba tinan 2022, vaga ne’ebe mak ofrese ba kandidatu feto total 30% ka 300 vagas.

“Tuir dados ne’ebe iha, feto ne’ebe mak partisipa hodi kompete ho mane sira iha rekrutramentu membru F-FDTL foun ne’e hamutuk nain 149. Ita hare ne’e partisipasaun feto ne’e menus liu kompara ho mane,” nia dehan.

Nia dehan, rekrutamentu ba tinan 2022, ba joven Timoroan hamutuk vagas nain 600, no husi ne’e for prioridade ba kandidata feto 30% no mane 70%.

“Total kandidatu ne’ebe admitidu ona iha selesaun dokumentu hamutuk nain 1.411 kompostu husi mane nain 1.262 feto nain 149. Sira sei kuntinua ba tuir teste saude,” nia hatete.

Tanba ne’e nia dehan, espera katak iha prosesu teste ba saude nian ne’e feto nain 149 ne’e bele mantein nafatin nune’e labele menus ba beibeik.

“Bainhira presentage feto la tuir numeru ne’ebe mak komandu fo sai ona sei la iha tan rekrutamentu ba feto maibe prense fali deit [ho kandiatus mane] hodi kompleta ba vagas 600,” Kapitao da Costa informa.

Nia dehan, Komandu F-FDTL no governu presija joven feto nia partisipasaun iha momentu rekrutamentu, nune’e bele hatudu ba mundu katak feto Timoroan mos intrese involve iha forsa armada.

Entretantu, Sekretaria Estadu ba Igualidade no Inkluzaun, Maria do Rosario Fatima Correia, dehan partisipasaun feto importante iha area hotu tantu F-FDTL no governu.

“Ita la fo sala governu, maibe ita ptesija enkoraga joven feto sira atu bele iha mentalidade diak hodi kompete iha rekrutamentu saida deit. Ita hare numeru [vagas] ne’ebe governu ofrese ba feto hodi hola parte iha instituisaun militar ne’e diak tebes,” SE SEII Correira salienta.

Tanba ne’e, nia husu ba joven feto sira labele lakon oportunidade saida deit ne’ebe mak governu ofrese, tanba partisipasaun feto iha vida aspetu hotu sosiedade Timor importante tebes.

“Ita koragem nafatin ba maluk feto foinsa’e sira ne’ebe mak pasa ona iha rekrutamentu ne’e, mantein ho responsabilidade no disipliha, kuidadu saude hodi hala’o imi nia knar tuir ordem komandu nian,” nia hatete.