- Publika iha: 29 Novembro 2021
Turi peskija ne'ebe mak ONG Belun halo ba feto vitima violensia domestika hamutu nain 247 ne'ebe mak akontese iha sosiadade hatudu katak feto sira prefere liu rezolve kazu ho dalan kultural tanba dalan legal susar tebes atu hetan rezultadu.
Ofisial Peskija iha Belun, Maria Fatima Sara, hateten peskija ne'ebe mak sira halo iha area kobertura hanesan, Bobonaru, Ermera, Baucau no Ainaru, ba vitima nain 247 sira hateten violensia domestika ne'e akontese sira prefere liu rezolve ho dalan familiar.
“Feto sira prefere liu rezolve kultural tanba ami hetan lalais rezultadu," Peskijador Belun Sara hateten.
Nia dehan, tuir lolos ne'e rezolve tuir dalan legal tanba violensia domestika ne'e krimi publiku, maibe atu hetan rezuktadu ne'e mak presija lori tempu naruk dala ruma mos rezultadu la iha ne'e mak vitima sira lakoi.
"Iha intervista vitima sira hato'o mai ami katak bainhira sira lori kazu violensia domestika ne'e rezolve tuir dalan legal, sira tenke mai to'o Dili no sira la iha osan hodi selu kareta, nune'e labarik sira se mak atu hare no ba iha kapital presija osan," nia hateten.
Nia hateten, situasaun hirak ne'e mak halo vitima sira lakoi lori kazu violensia domestika ne'e ba tribunal bainhira kazu ne'e rezolve tuir dalan kultural tenke involve husi polisia, autoridade lokal no familia feto san uma mane.
Enkuantu nia hateten, vitima sira mos dehan dalaruma prosesu legal ne'e mos halo sira fahe malu ho sira nian laen, ikus mai laen ba hola feto seluk.
Entretantu, Komandante Polisia Munisipiu Dili, Superientendente Xefe Henrique da Costa, hateten kazu violensia domestika ne'e krimi publiku maibe, lei fo dalan atu rezolve tuir kultura.
"Lalaok rezolve kazu violensia domestika tuir adat bainhira vitima ba hato'o keixa ba xefe suku no polisia, maibe ita husu fali ba vitima nia hakarak prosesu oin ba tribunal ka adat, ita tuir sira no la bele obriga," Komandante Costa hateten.
Nia hateten, bainhira vitima sira hakarak rezolve adat, entaun konvida familia husi parte 2 depois konvida autoridade lokal polisia tuir hamutuk mak rezolve no desizaun iha sira nia liman kuntinua sira nia relasaun ka hapara.
Alende ne'e nia dehan, durante ne'e sira akonpanha ona rezolve problema tuir adat ne'e balun deside kuntinua no balun hakarak hapara sira nia relasaun.