Quarta, Setembro 22, 2021

Chefe Departamentu Nutrisaun, Iha Ministerio da Saúde, Doutora Olinda dos Reis Albino hateten prevalensia feto reprodutiva idade tinan 15-49 sofre kondisaun defisiensia micronutriente ka anemia iha Timor-Leste sei a’as, tanba dadus peskiza demografia no saúde tinan 2016, hatudu 40%.

Chefe Departamentu Nutrisaun, Iha Ministerio da Saúde, Doutora Olinda dos Reis Albino hateten prevalensia feto reprodutiva idade tinan 15-49 sofre kondisaun defisiensia micronutriente ka anemia iha Timor-Leste sei a’as.

Nia dehan anemia ne’e tipu defisiensia micronutriente katak ema nia ran menus, tanba normalmente ema idade adulto karga hemoglobina 11-12 gram, maibe ema barak la to’o ida ne’e. No inan isin rua sira balun nia karga hemoglobina iha deit 5 grama, ne’e fo risku bo’ot ba inan no bebe.

“Prevalensia anemia ba feto idade reprodutivu sira mais 40%, ita bazea ba padraun Organizasaun Mundial Saude (OMS) nian inklui mos labarik sira ne’ebe sofre anemia mos a’as. Ne’e sai problema ne’ebe kritiku tebes iha saúde publika iha Timor-Leste,” nia hateten hafoin partisipa iha atividade konsultasaun planu estratejiku nasional nutrisaun setor saúde tinan 2021-2025, iha salaun São Jose, Catedral, Dili.

Nia hateten intervensaun ne’ebe sira halao hodi prevene deznutrisaun maka distribui aimoruk vitamina A, micronutriente no aimoruk lubringa ba labarik sira, ne’ebe halao iha fulan Febreiru no Agostu kada tinan.

Nia hatutan sira mos iha ona planu atu reforsa distribuisaun aimoruk aumenta ran ba feto idade reprodutivu sira, liu-liu feto foinsa’e sira atu prepara sira iha kondisaun saúde ne’ebe diak antes forma uma kain no iha oan.

Alende ne’e, nia dehan ba grupo inan isin rua sira nafatin enkoraja atu halo konsulta kuidadu ante natal rutina atu bele iha kontrolu ba kondisaun saúde inan no bebe iha kanotak, no simu mos aimoruk aumenta ran hodi konsumu atu evita monu iha kondisaun hemoglobina tun.

Nia konsiente edukasaun promosaun saúde importante tebes atu reforsa hodi hasa’e konsensia publika konaba importansia fo susu been inan ba bebe foin moris to’o tinan rua, no enkoraja ema hotu promove aihan lokal hodi kontribui hadia nutrisaun iha familia tanba Timor-Leste riku aihan variante oioin ho valor nutrisaun ne’ebe a’as.

Entretantu, Pontu Fokal Scaling Up Nutrition Movement, iha Timor-Leste, Filipe da Costa hateten nutrisaun ne’e problema baziku husi problema seluk tanba ema nutrisaun ladiak imunidade tun no fasil hetan infesaun moras oioin tanba ne’e tenke halo duni investimentu ne’ebe apropriadu ba hadia nutrisaun ema nian, liu-liu grupo alvu sira hanesan labarik, feto foinsa’e, inan isin rua no inan fo susu sira.

“Ita presiza prioritiza duni investimentu iha nutrisaun, Iha setor saúde diak liu fo prioridade makas ba aktividade prevensaun malnutrisaun iha teritorio laran tomak,” nia hateten.

Nia dehan problema ne’ebe estado enfrenta ligadu ho problema deznutrisaun bo’ot liu rekursu ne’ebe iha tanba ne’e importante kapitaliza rekursu hotu no prioritiza intervensaun sira atu foku hodi rezolve problema.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04