Domingo, Maio 16, 2021

Diretora Ezekutivu Organizasaun Fundasaun Alola, Maria Imaculada Guterres preokupa iha individu no grupo balun ne’ebe distribui produtu susuben formula tantu rahun no liquidu ba bebe no labarik sira iha kampu evakuasaun tanba susuben formula lori risku ba saúde labarik sira nian, liu-liu bele kauza ba moras diareia, infesaun respiratoriu, ne’ebe ikus mai monu ba malnurisaun.

Diretora Ezekutivu Organizasaun Fundasaun Alola, Maria Imaculada Guterres preokupa iha individu no grupo balun ne’ebe distribui produtu susuben formula tantu rahun no liquidu ba bebe no labarik sira iha kampu evakuasaun.

Nia salienta kodigu internasional merkadoria substituisaun susuben, no matadalan Organizasaun Mundial Saúde (OMS) no UNICEF kona ba aihan ba labarik iha situasaun emergensia, ne’ebe estado Timor-Leste adopta bandu atu distribui susuben formula ba labarik tinan 3 mai kraik iha kampu refujiadu.

“Ita hakarak bebe no labarik sira ne’e labele sai tan fali vitima ba dala rua tanba dezastre sira ba ona hela iha IDP’s, ita tenke salva sira atu labele hetan tan moras hodi ba baixa iha hospital,” nia hateten iha servisu fatin Maskarinhas, Dili.

Nia dehan sira hamutuk ho UNICEF no departamentu nutrisaun iha ministerio da saúde halo ona diskusaun ba asuntu ida ne’e, no sei hasai karta ida atu hapara distribuisaun susuben formula tantu rahun no liquid ba labarik sira iha sentru evakausaun.

Nia hatutan situasuan no kondisaun iha sentru evakuasaun ne’e ladun ijiene no limitasaun oin tanba ne’e iha posibilidade bo’ot tebes atu akontese kontaminasaun ba aihan sira durante preparasaun.

Nia haktuir susuben formula laos deit kauza moras iha kurtu prazu liga ba prepasaun ne’ebe la ijiene, maibe bele sai fator determinante ida ba labarik sira atu hetan moras kronika seluk hanesan tensaun a’as, diabetiku, obesidade no seluk tan iha future.

Iha oportunidade ne’e, nia hato’o agradese ba individu no grupo sira ne’ebe fo ona apoia aihan no nesesidade bazika seluk ba komunidade sira iha kampu evakuasaun, maibe importante atu hare aihan sira ne’ebe seguru no saúdavel ba labarik sira atu konsumu iha situasaun emergensia nia laran.

Nia informa sira nia ekipa grupo suporta inan tama sai hela sentru evakuasaun sira atu fo akonseilamentu ba inan sira konaba importansia susuben inan nian ba saúde bebe nian no risku husi fo susuben formula ba bebe sira durante hela iha kampu evakausaun.

Iha parte seluk, Diretur Ezekutivu Organizasaun Saúde Ba Ema Hotu (SABEH), Doutor André Belo hateten presiza duni iha kordenasaun servisu entre grupo sira atu fornese aihan ne’ebe nutritivu ba inan isin rua, inan fo susu no labarik sira iha kampu evakuasaun tanba inan no labarik barak.

Nia dehan iha kampu evakuasaun João Paulo, inan isin rua barak no balun foin partus semana rua obrigado tenke toba iha rai, lona okos no han hahan ne’ebe fornese husi grupo humanitarian sira.

“Ita presiza hare ida ne’e atu oferese aihan ne’ebe nutritivu ba vitima sira, liu-liu labarik, inan isin rua no inan fo susu sira. Inan sira presiza han aihan ne’ebe nutritivu atu sira bele fo susu sira nia oan ho diak, duke ita lori susuben ba fahe ba sira fo ba oan sira diak liu ita lori aihan nutritivu ba sira han susuben barak fo susu oan sira,” nia hateten.

Nia dehan presiza kria kozinha movel ida atu prepara aihan ba bebe, labarik, inan isin rua no inan fo susu sira iha sentru evakuasaun tanba sira presiza aihan ne’ebe nutritivu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04