Domingo, Junho 20, 2021
Total visitors: 566016

Presidente Cruz Vermelha de Timor-Leste (CVTL), Madalena Hanjan hateten sira iha voluntario 6,000 iha teritorio tomak apoia governu responde ba situasaun emergensia, liu-liu halo evakuasaun no mobilizasaun ba sidadaun sira, liu-liu inan oan no ferik katuas sira ne’ebe afetado husi inundasaun ba centru evakuasaun sira atu hetan tulun.

Presidente Cruz Vermelha de Timor-Leste (CVTL), Madalena Hanjan hateten sira iha voluntario 6,000 iha teritorio tomak apoia governu responde ba situasaun emergensia.

Nia dehan inundasaun ne’ebe akontese iha loron 4 fulan Abril ne’e, todan tebes tanba ema barak lakon hela fatin no sira tenke hela iha centru evakuasaun.

“Iha ne’e ami iha 80 familia ho ema kuaze atus ida, maibe ami simu grupo vulneravel deit hanesan familia iha inan aman no bebe entau ami foti maka inan no bebe aman bele hela iha fatin evakuasaun seluk ne’ebe besik. Inan no bebe ami lori mai iha ne’e sira tenke hetan bee manas regular, sasoro, susubeen no aihan,”

“Ami labele akumula hotu familia tomak tanba ami nia kapasidade la bo’ot too iha ne’eba, ne’e duni agora ami simu 80 familia iha ne’e, no sira ne’e inan no kosok oan sira deit inklui mos katuas no ferik balun,” nia hateten via telephone.

Nia dehan sira mos dada taan tenda atu bele akumula mos sidadaun sira ne’ebe ho kondisaun forte bele deskansa, maibe ba inan no kosok oan sira deskansa iha uma laran.

Nia hatutan centru evakuasaun CVTL iha bebe kaduak ho idade semana ida, nune’e mos iha labarik sira tinan rua mai kraik.

Nia haktuir sira iha stok aihan ne’ebe sufisiente atu fornese ba sidadaun sira iha centru evakuasaun Dili no munisipio sira tanba sira hetan apoia mos husi setor privado sira balun no ema individu sira ne’ebe iha kibi’it atu tulun sira ne’ebe presiza iha momentu ida ne’e.

Nia informa ekipa CVTL kontinua servisu hamutuk ho governu halo asesmentu hodi fo dadus ne’ebe klaru ba estado atu bele fo apoia rehabilitasaun ruma ba vitima sira.

Iha parte seluk, Ministru Prezidensial Konsellu Ministrus Fidelis Magalhães hateten inundasaun ne’e akontese iha zona barak iha teritorio tomak, ne’ebe rezulta familia barak lakon hela fatin no balun lakon vida.

Nia dehan dadus provizorio ne’ebe numeru vitima mortalidade hamutuk ona nain 27. Husi total mortalidade ne’e nain 13 iha Dili, no kuaze ema nain 7,000 maka lakon hela fatin entau sira hela iha centru evakuasaun 12 iha Dili laran.

“Ohin iha ekontru ne’e deside ona, katak apoia humanitaria hotu sei kanaliza husi Sekretario Estado Protesaun Sivil. Tanba ne’e, apela ba sidadaun sira hotu se maka iha kibi’it atu apoia ba familia sira ne’ebe lakon uma, hela fatin no presiza apoai emergensia favor ida hakbesik aan ba hodi nune’e bele kanaliza ba hira ne’ebe presiza iha momentu ida ne’e,” nia hateten.

Nia dehan ministeriu relevante sira halo nafatin akompanhamentu no halo monitorizasaun ba iha centru evakuasaun sira hanesan Dom Bosco Comoro, edisio SEPS Kaikoli, edifisio Ministerio Finansas, Liceu UNTL, CVTL, INFORDEPE Balide, Igreja Bidau, Madre Salisiana Balidi no seluk tan.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04