Suplementu Super Cereal Ba Inan Isin Rua Laiha

Kordenador Nutrisaun, iha sentru saúde formoza 2, Antonio da Cruz informa tinan ida ona suplementu nutriente super cereal atu fo ba inan isin rua sira ne’ebe sofre malnutrisaun konsumu hodi ajuda rekupera laiha tanba ne’e sira fo deit akonseilamentu ba inan sira atu konsumu aihan lokal ne’ebe iha valor nutriente a’as.

Nia dehan suplementu super cereal ne’e apoia husi organizasaun World Food Program (WFP) atu fahe ba inan isin rua no inan fo susu sira ne’ebe identifikadu sofre malnutrisaun bele ajuda rekuperadu atu asegura bebe iha kanotak kondisaun diak.

“Inan ne’ebe ita sukat liman kabun leten menus husi 23 cm maka tama iha programa suplementu aihan bolu super cereal ne’e, maibe hahu fulan Marstu tinan 2020, suplementu ne’e stok laiha ona no kontinuasaun laiha to’o agora,” nia hateten iha servisu fatin bairo Formosa, Dili.

Nia dehan bainhira identifika inan isin rua no inan fo susu ne’ebe sofre malnutrisaun, sira fo edukasaun promosaun saúde no akonseilamentu ba inan sira kona ba aihan sira ne’ebe iha valor nutriente atu sira prepara no konsumu hodi ajuda rekuperasaun estado nutrisaun.

Nia hateten inan isin rua no fo susu sira presiza konsumu aihan nutritivu oin tolu maka aihan fo energia, aihan ba dezenvolvimentu isin nian, no aihan fo protesaun ba isin atu bele bebe ne’ebe iha kanotak laran bele dezenvolve aan ho diak no moris ho kondisaun ne’ebe saúdavel.

Nia haktuir inan isin rua ne’ebe ho kondisaun malnutrisaun la hetan suplementu nutriente, no la konsumu aihan nutriente sira sei fo impaktu bo’ot ba dezenvolvimentu bebe iha kanotak, no bebe moris mai ho kondisaun malnutrisaun.

Entretantu, Xefe Sentru Saúde Comoro, parteira Emilia de Sousa hateten tinan ida ona apoia suplementu nutriente ba inan isin rua no inan fo susu laiha tanba stok iha armajena mamuk.

Nia dehan anterior sira fo batar uut ba inan sira ne’ebe identifika sofre malnutrisaun, maibe dadaun ne’e la apoia tanba stok laiha.

“Ami identifika sira fo promosaun no akonseilamentu ba sira oinsa konsumu hahan ne’ebe iha nutriente diak hodi hasa’e isin, no ami fo mos vitamina,” nia hateten.

Nia hatutan iha inan balun maka halo tuir, liu-liu hadia konsumu lorloron tanba bainhira sira mai fali konsulta kuidadu ante natal rekupera, maibe barak mos laiha mudansa.

Iha parte seluk, Vice Ministru da Saúde, Bonifacio Maucoli dos Reis rekonhese programa apoia super cereal ba inan isin rua sira parado, maibe governu koalia ona ho parseiru dezenvolvimentu sira atu re-ativa produsaun batar u’ut iha Railaco Munisipio Ermera atu bele distribui ba fasilidade saúde sira fo ba inan isin rua sira ne’ebe sofre malnutrisaun.

“Ida ne’e mos parte ida motiva inan sira hakbesik aan mai fasilidade saúde tanba ne’e iha orsamentu tinan 2021, sei sosa mos suplementu nutriente sira atu bele distribui ba inan no labarik sira ne’ebe ho estado malnutrisaun,” nia hateten.

Nia dehan atu re-ativa fabrika batar u’ut iha Railaco presiza kustu ne’ebe bo’ot tanba ne’e governu liu husi Ministerio Negosio Estranjeiru no Koperasaun (MNEK) halo ona karta ba governu China atu bele apoia tanba sira iha komitmentu atu suporta re-produsaun batar u’ut iha rai laran.