Quarta, Janeiro 27, 2021
Total visitors: 544951

Ministru Edukasaun Joventude no Desportu (MEJD), Armindo Maia hateten feto ne’ebe tur iha kargu diretora, chefe, no kordenador eskola sei menus tebes kuaze 1% deit tanba sosiedade sei forte tebes ho mentalidade patriarkal, ne’ebe konsidera feto nia fatin mak iha dapur halao servisu domestiku no hare labarik sira.

Ministru Edukasaun Joventude no Desportu (MEJD), Armindo Maia hateten feto ne’ebe tur iha kargu diretora, chefe, no kordenador eskola sei menus tebes kuaze 1% deit .

Nia salienta papel edukasaun nian importante tebes atu muda pensamentu patriarkal ida ne’e tanba ne’e tenke enkoraja feto potensial sira asume kargu importante sira iha edukasaun hodi promove edukasaun ida ne’ebe integradu no inklusivu ba jerasaun prejente no foun sira mai.

“Ita nia partisipasaun feto iha edukasaun formal diak, ita hare husi rasio estudante sira entre feto no mane iha balansu 50% laiha diferente. Ita rekonhese manorin feto mak ita tenke enkoraja liu tan tanba faktu iha nasaun barak manorin sira feto mak barak liu, maibe ita nian mane mak domina,” nia hateten bainhira halo abertura ba konferensia nasional ho tema lideransa feto iha setor edukasaun iha salaun Delta Nova, Dili.

“Kona ba profesores feto mak ita tenke enkoraja liu tan. Iha nasaun barak professor feto barak liu ita nian ne’e mane mak domina liu, maibe la signifika ita duni tiha mane sira truka fali feto, maibe ita tenke ekoraja nafatin feto sira tanba edukasaun dala barak liu feto sira mak iha papel importante,” nia haktuir.

Nia espera konferensia ida ne’e bele hamosu ideias diak sira atu hakbi’it no haforsa lideransa feto sira iha setor edukasaun nian tanba feto nudar lideransa edukasional no examplar ba edukasaun ida ne’ebe integradu no inklusivu hodi forma jerasaun examplar sai autor ba dezenvolvimentu ne’ebe sustentavel.

Entretantu, Diretora Servisu Edukasaun Munisipio Aileu, Cristina da Conceição hateten feto asume kargu lideransa iha setor edukasaun menus tebes tanba husi 12 munisipio inklui Rejiaun Espesial Administrativu Oecusse Ambeno (RAEOA) feto ida deit domina husi mane.

“Ita koalia atu sai lideransa hodi asume kargu ruma primeiru mak konfiansa, maibe ita feto seidauk hetan konfiansa maximu. Ita hare nomeasaun fator ida mak seidauk hetan konfiansa no dala ruma mos feto seidauk prontu sai lider tanba ne’e ita hare numeru ne’e menus tebes,” nia dehan.

Nia dehan atu hetan asesu ne’ebe balansu entre feto no mane tenke asegura iha lei rekrutamentu sira no hakbi’it feto sira no enkorja sira kaer kargu lideransa iha setor edukasaun tanba feto mak edukador examplar iha familia, sosiedade no eskola.

Iha parte seluk, Embaixador Australia iha Timor-Leste, Peter Roberts hateten governu Australia iha komitmentu atu apoia governu Timor-Leste hodi promove igualidade jeneru, liu-liu iha setor edukasaun.

“Ita hotu tenke lembra katak atu hapara violensia hasoru feto no labarik feto tenke hahu ho igualidade jeneru. Bainhira ita iha lideransa feto iha eskola laran ita bele muda labarik sira nia hanoin kona ba feto nia papel no abilidade iha sosiedade tanba ita hatudu feto bele,” nia hateten.

Nia espera konferensia ne’e bele fo informasaun ne’ebe diak liu tan ba partisipante sira kona ba dezenvolvimentu profesional iha lideransa nian.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04