- Publika iha: 23 Novembro 2020
Feto Polisia Serviso Migrasaun nain 48 dadaun ne’e destaka ona iha posto migrasaun iha fronteira hodi hala’o misaun hanesan kontrola movimento ema nian tama no sai husi fronteira.
Diretor Jeral Servisu Migrasaun (SM), Superintendente Asistente Luis Soares Barreto hateten, feto Polisia Serviso Migrasaun ne’ebe mak durante ne’e halo serviso hamutuk ho mane sira iha nain 100 resin no husi efetivo ne’e sira halo serviso iha admistrasaun nian no sai adido maibe destaka iha posto fronteira ne’e seidauk.
“Iha tinan ida ne’e ita koko destaka feto Polisia Serviso Migrasaun hamutuk nain 48 iha posto fronteira sira hodi hamutuk ho mane halo serviso kontrolo,” DJ Bareto hateten.
Nia dehan, feto ka mane kuando hamanon an ona iha instituisaun seguransa nian tenke halo serviso hotu tanto feto ka mane.
“Feto Polisia Serviso Migrasaun nain 48 ne’e ita koloka iha posto fronteira Bobonaru, Covalima no Oecuse,” nia hateten.
Nia dehan, tuir nia hare feto nain 48 ne’ebe mak destaka ona ba posto fronteira durante ne’e sira nia prestasaun apoio serviso diak tebes no la iha duvida hodi lokola sira halo serviso kontrola iha fronteira terestre.
Entretanto, Feto Polisia Serviso Migrasaun Emilia Cardoso hateten, konfiansa ne’ebe hetan husi superior sira hodi hala’o knar iha posto fronteira ne’e nia simu ho laran haksolok tanba bele aprende tan esperiensia foun.
“Hau simu konfiansa hamutuk ho kolega feto nain 8 hodi ba hamutuk ho kolega mane sira hodi halo kontrolo ba movimento nasional no internasional iha fronteira terestre liu-liu iha Posto Tunubibi nian,” nia informa.
Nia dehan, serviso ne’ebe mak sira sei halo iha posto mak hanesan halo operasaun ba buska ruma, nune’e kontrola kontrabando nune’e mos movimento ilegal sira.
“Serviso ne’ebe mak ami halo ne’e la iha direferente ho mane tanba bainhira tama ona iha operasaun ne’e halo serviso hanesan, fiar katak ami feto nain 8 hamutuk ho mane sira halo serviso diak hodi asegurasa serguransa ba iha fronteira,” Cardoso dehan.
Tanba ne’e nia dehan, espera katak ho sira nia prezensa iha posto fronteira bele minimiza krime kontrabando iha fronteira terestre.