Iha ambitu komemorasaun loron nasional feto ba dala 45, Presidente da Republika, Francisco Guterres Lú Olo, rekoñese estado liu husi governu seidauk fo importansia loloos ba feto nia papel nudar ema no inan, ne’ebe fo benefisiu barak liu ba familia no sosiedade.

Iha ambitu komemorasaun loron nasional feto ba dala 45, Presidente da Republika, Francisco Guterres Lú Olo, rekoñese estado liu husi governu seidauk fo importansia loloos ba feto nia papel nudar ema no inan, ne’ebe fo benefisiu barak liu ba familia no sosiedade.

Nia dehan, loron 3 fulan Novembru tenke sai loron espesial ba ema ida-ida atu halo reflesaun klean ba sira nia hahalok no hanoin sira kona ba feto sira tanba resenseamentu tinan 2015, hatudu populasaun kuaze 600,000 resin husi 1.3 milliaun mak feto, katak forsa ida ne’ebe estado tenke konsidera iha prosesu dezenvolvimentu nasional.

“Tinan-tinan ita selebra loron nasional feto, maibe ita seidauk fo importansia lolos ba feto ninia papel, nudar ema no nudar inan, ne’ebe halao knar iha familia, prepara aihan nutritivu, tau matan ba oan nia saude diak, oan nia edukasaun, no eduka ona sira kona ba valores no prinsipius. Knar sira ne’e, feto halo horiuluk no sei halo ohin loron to’o abanbairua. Maibe ita seidauk uza potensial feto sira nian iha prosesu foti desizaun fo benefisiu barak liu ba familia no ita nia sosiedade,” nia hateten iha komunikadu imprensa ne’ebe TDW asesu.

Nia dehan, estado valoriza tebes feto sira nia partisipasaun iha luta, maibe seidauk valoriza inan no feton sira iha tempu ukun aan nudar ema, sidadaun no trabalhadora.

Nia hatutan, governu tenke halo duni politika inkluzaun sosial efetivu ida atu garantia feto sira nia kbiit atu hanoin no deside tanba tempu ona atu rekoñese feto sira nudar air in importante ida iha nasaun.

Entretantu, Presidente Rede Feto Timor-Leste, Yasinta Lujina hateten feto sira kontinua hasoru dezafiu oioin iha setor ekonomia, saude, justisa, infrastruktura, violensia, no asuntu sosial seluk ne’ebe feto sira enfrenta iha sira nia moris lorloron.

“Selebrasaun ne’e hodi hanoin hikas ita nia heroina sira no feto Timor tomak nia kontribuisaun no luta ba ukun rasik aan, ne’ebe to’o ohin loron kontinua firme hodi kontribui ba dezenvolvimentu rai doben Timor-Leste,” nia hateten.

Nia dehan, Rede Feto ho membru organizasaun 43 kontinua halo servisu hodi promove direitu feto nian no igualidade jeneru iha rai laran, maibe sosiedade sivil mesak sei labele hakotu siklu violensia ne’ebe hasoru feto no labarik.

Nia haktuir, estado mak autor principal ne’ebe iha obrigasaun atu promove, proteje no hakonu direitu sidadaun nian liga ba konstituisaun RDTL Artigu 105 kona ba kompetensia no knar governu nian.

Iha parte seluk, Membru Parlamentu Nasional, Deputada Elvina de Sousa hateten buat balun mak atinji ona iha servisu promosaun igualidade jeneru hanesan partisipasaun feto iha vida politika a’as iha parlamentu no iha instituisaun governu sira feto barak tur iha kargu, maibe feto sira iha area rural sei sente marjenilizadu iha prosesu dezenvolvimentu.

“Loron nasional feto ne’e sai reflesaun ida atu hare buat ne’ebe seidauk atinji hanesan dezenvolvimentu feto rural. Ita hakarak dezenvolvimentu ida ne’ebe inklusivu ba ema hotu tanba komunidade barak hela iha area rural,” nia hateten.

Nia dehan dezenvolvimentu lao iha area rural konserteja feto no labarik sira sei hetan benefisiu bo’ot ba hadia sira nia moris tanba sira lalakon tempu barak ba kuru bee, hili aii, lao sae foho tun foho hodi hetan atendimentu saúde.