Segunda, Outubro 26, 2020
Total visitors: 530117

Organizasaun Fundasaun Alola (FA) no Komite Nasional Kankru Susun Timor-Leste (KNKST) lansa kampaña Outubru Roza hodi halo sensibilizasaun ba komunidade sira kona ba prevensaun no sinais kankru susun atu ajuda ema ida-ida halo detesaun sedu ba aan rasik tanba deteksaun sedu bele salva vida.

Diretora Executiva FA, Maria Imaculada Guterres hateten kampaña Outubru Roza ne’e hanesan eventu anual ne’ebe nasaun sira iha mundu tomak dedika atu halo sensibilizasaun moras kankru susun.

Diretora Executiva FA, Maria Imaculada Guterres hateten kampaña Outubru Roza ne’e hanesan eventu anual ne’ebe nasaun sira iha mundu tomak dedika atu halo sensibilizasaun moras kankru susun.

“Numeru kazu ne’ebe registu iha hospital nain 360 pasiente. Husi ne’e 80% mai ho kazu avansadu, ne’e katak sira mai ho kondisaun ne’ebe grave ona tanba ne’e ita habelar informasaun liu husi meus oioin ba joven sira no sira bele hatutan ba parte hotu atu ita hamutuk salva vida tanba ho situasaun fasilidade ne’ebe limitadu difisil garantia salva ema nia vida, bainhira ita lahalo deteksaun sedu,” nia hateten bainhira halo abertura ba atividade sensibilizasaun Outubru Roza iha Uma mahon Xanana Reading Room, iha Lesidere, Dili.

Nia dehan, atividade sosializasaun ne’e sei halao durante fulan tomak iha komunidade jeral no estudante sira iha eskola sekundario tanba dadus hatudu pasiente barak ho idade 14 to’o 45.

Alende ne’e, nia dehan sira mos sei halao atividade visita pasiente kankru susun iha ospital no pasiente sira ne’ebe hetan tratamentu suportivu iha uma hodi fo akonseilamentu no enkoraja sira.

Nia hatutan, sira mos sei halo advokasia ba nivel alto, liu-liu parlamentu nasional atu bele konsidera servisu oncologia iha planu orsamentu tinan 2021 nian tanba dadus hatudu tratamentu kankru halao hotu iha rai liur.

Iha parte seluk, Vice Presidente Komite Nasional Kankru Susun Timor-Leste, Mediku Cirurgia iha Hospital Nasional Guido Valdares, Doutor Raimundu dos Santos hateten atividade sensibilizasaun moras kankru importante tebes tanba maioria pasiente sira aprezenta an iha stadiu 3 no 4.

Nia dehan, preokupasaun bo’ot ne’ebe iha mak sosiedade barak laiha koñesementu kona ba moras kankru susun tanba ne’e bainhira mosu kafuak iha susun sira uza aimoruk tradisional hodi taka ba susun no la lori sedu ba fasilidade saude.

“Ita hakarak halo sosializasaun tun to’o baze atu ema hotu-hotu hatene kona ba sinal kankru susun. Sira hatene mak sei aprezenta sedu no ita bele salva, tanba ho kafuak ki’ik ita halo operasaun kompletu hasai tomak iha area sira ne’ebe afetado mak sei lahadaet ba isin lolon seluk no la muda aan husi stadiu avansadu,” nia hateten.

Nia dehan, servisu unidade oncologia seidauk estabelese ho diak tanba servisu ida ne’e hahu husi halo investigasaun, operasaun no tratamentu kontinua laiha entau obriga pasiente hotu tenke halo referral ba iha rai liur.

Nia informa, seidauk iha espesialista oncologia Timoroan, maibe iha mediku oncologista Cubano ida hamutuk ho mediku cirurgia sira mak halao hela servisu iha hospital nasional, liu-liu halo operasaun ba kankru susun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04