United Nations Development Program (UNDP) fasilita formasaun kombate violensia seksual hasoru labarik menoridade ba membro investigadores Unidade Polisia Vuneravel (VPU), PNTL, nain 30.

United Nations Development Program (UNDP) fasilita formasaun kombate violensia seksual hasoru labarik menoridade ba membro investigadores Unidade Polisia Vuneravel (VPU), PNTL, nain 30.

Reprezentante UNDP iha Timor-Leste, Tuya Altangerel hateten, UNDP liu husi programa Spotlight ho Fundasaun Asia hodi apoio PNTL, liu-liu Unidade Polisia Vuneravel (VPU), konaba kapasitasaun abilidade membro investigasaun sira nian konaba kazu abazu no asalto seksual ba labarik no oinsa atu kombate.

“Kazu abuzu seksual, violasaun seksual ne’e sempre akontese iha Timor nune’e mos nasaun 8 iha Asia, inkliu Timor-Leste. Tuir relatorio World Vision nian iha tinan 2019 labarik hamutuk 612.00 mak sai vitima ona ba violasaun sira,” Reprezentante UNDP Tuya hateten.

Tanba ne’e mak UNDP iha inisiativa investe orsamento hamutuk 3 milhoes dolares amerikanu hodi halo formasaun membro investigasaun VPU-PNTL nian.

“Formasaun ne’ebe iha apoio ne’e hodi halo investigasaun ne’ebe mak efikasia ba krime ka violasaun sira hasoru labarik menoridade tenke akompana husi keixa to’o preparasaun dokumentu krime nian, jestaun krime nian, no apoio ba vitima sira,” nia hateten.

Iha fatin hanensan, Komandante Investigasuan Kriminal, PNTL, Superintendente Xefe Jose Neto Mok hatete, formasaun refere halo tanba koperasaun diak ho TLPDP, no UNDP, nian ba membru sira ne’ebe espesifiku liu investigasaun criminal ba iha VPU.

“Kursu ida ne’e atu kapasita ita nian membru investigasaun sira para halo investigasaun ne’ebe ho professional, tanba ne’e ita persija kapasita ita nian ema liu hosi kursu oin-oin nune’e tau matan ba kazu sira ne’ebe mak hasoru labarik feto menoridade,” Komandante Neto Mok hateten.

Nia dehan, kursu ne’e importante tebes ba membro investigasaun VPU nian nune’e bele aumenta sira nian kapasidade nune’e bele serviso ho profesionalismo hodi kombate kazu violasaun seksual sira ne’ebe mak sempre akontese iha Timor-Leste.

Entretanto, Xefi VPU Covalima, Primeiru Sarjentu, Amelia de Jesus Amaral dehan, formasaun ida ne’e importante tebes hodi bele kombate krime abuzu seksual ba minoridade sira iha suku no postu sira oinsa atu prosesu hodi bele hetan justisa ne’ebe tuir lei.

“Kazu violasaun seksual ne’e tenke prosesu tuir lei nune’e ema hotu bele tauk atu komete kazu sira ne’e,” nia hateten.

Nia dehan, husi kursu ne’e mos nia aprende konaba oinsa atu bele halo atendimento ne’ebe mak seguro ba vuneravel sira, liu-liu feto no labarik sira, ne’ebe mak sai vitima ba kazu violasaun seksual.