- Publika iha: 22 Julho 2014
Ho kazu feto so’e sira nia bebe ne’ebe kontinua buras iha rai laran, liu-liu iha Dili laran, tuir Sekretaria Estadu ba Promosaun Igualdade, Idelta Maria Rodrigues, katak hahalok ida ne’e akontese, tanba edukasuan iha uma laran sei fraku.
SE Rodrigues, hateten familia iha responsabilidade bo’ot atu kontrola, eduka no akompanha oan feto sira ba futuru ne’ebe diak, tanba situasaun modernizasaun ne’ebe dadaun ne’e Timor –Leste adopta perigozu tebes.
“Familia tenke kontrola, haree difikuldade no problema ne’ebe oan sira hasoru no oan sira mos tenke buka meus atu nakloke koalia ba familia, se taka ikus mai rebenta, feto mak lori todan no labarik inosente sira mak sai vitima,” SE Rodiruges hateten, iha Kaikoli, Dili.
Tanba falta kontrola husi familia, nia dehan, entaun sira uja salah modernizasaun ne’ebe iha no sira la preparadu simu realidade ne’ebe iha sira nia oin.
Nia dehan, problema ida ne’e seriu tebes, tanba la’os akontese dala ida ou rua deit, maibe kuaze tinan-tinan to’o agora, la’os deit iha sidade Dili, maibe iha distritu balun mos.
“Hamate ema ida nia vida ne’e krime, hau husu ba Polisia atu halo investigasaun profundu hodi kondena autor,” SE Rodrigues sujere.
Iha parte seluk, Deputada Arão Noé de Jesus Amaral, preokupa tebes ho situasaun ida ne’e no husu inan aman sira atu kontrola no eduka nia oan sira, tanba edukasaun primeiru husi familia.
“Familia (inan aman) nia papel importante tebes, sira tenke kontrola no labele moe fo edukasaun seksual ba sira nia oan atu kompriende konsekuensia sira ne’ebe iha,” Noe hateten.
Iha parte seluk, Joventude Agostinha Fernandes hateten katak nia parte la hatene kazu ida ne’e bele sai trend iha Timor –Leste ikus –ikus ne’e tanba ne’e presiza hatene nia kauza lolos liu husi investigasaun ida ne’ebe profunda hodi bele kombate.
Nia hatutan, investigasaun ne’e importante tebes atu hatene nia kauza atu bele bolu atensaun mos ba familia sira hodi fo atensaun ba sira nia oan maibe tanba hetan violasaun seksual ruma tenke kondena mos autor violasaun ne’e laos feto deit.
“Presiza iha estudu ida klean ba kestaun ida ne’e, karik hetan violasaun seksual tanba iha diskriminasaun husi familia, bele mos insestu, “ nia hateten.