- Publika iha: 10 Junho 2014
Atu garantia kualidade produsaun grupo feto sira iha merkaduria, governu Thailandia liu husi sira nia embaixada iha Timor-Leste apoia orsamentu $2,762.31 ba Fundasaun Alola hodi kapasita no hadia sira nia kualidade produsaun.
Embaixador Thailandia iha Timor –Leste, Tawachai Koopirom, hateten governu Thaliandia iha komitmentu atu apoia parseiru sira hodi enkoraja feto sira sai husi trauma ne’ebe sira hasoru liu-liu vitima violensia domestika sira liu husi aktividade kooperativu balun.
Nia haktuir, ho apoiu sira ne’e bele ajuda ona grupo feto sira hodi hadia sira nia kaulidade produsaun hanesan tais, asesoris no seluk tan.
“Ami iha komitmentu atu apoia Alola hodi promove aktividade grupo feto sira nian no bele ajuda grupo sira hadia sira nia kualidade produsaun,” Embaixador Koopirom hateten, hafoin entrega bank check, iha salaun ekontru Fundasaun Alola, Maskarenhas, Dili.
Nia hatutan, ida ne’e la’os primeira vez, maibe kada tinan governu Thailandia apoiu parseirus sira hanesan FOKUPERS no Fundasaun Alola hodi promove saude inan ho oan, edukasaun ba feto inklui mos hakbi’it ekonomia grupo feto sira.
Durante 2012-2014 governu Thailandia apoia ona fundus ba aktividade organizasaun FOKUPERS ho Fundasaun Alola ho montante $11,000.
Entretantu, Diretora Ezekutivu Fundasaun Alola, Alzira Reis, hateten sira seidauk iha planu ba apoiu ne’e, maibe agradese ba governu Thailandia ne’ebe apoia ona fundus ba sira atu hakbi’it ekonomia grupo feto sira.
Nia hatutan, tanba fundus ne’e ki’ik, sei hare espesifiku liu ba iha kapasitasaun ba grupo ida inklui mos apoiu fundus ki’ik ba sira atu dezenvolve sira nia grupo ho kreatividade ne’ebe grupo iha ho kualidade.
“Ami sei haree liu ba iha kapasitasaun no apoiu fundus ki’ik ba sira atu implementa,” Diretora Reis dehan.
Nia informa, mos katak ho apoiu ne’ebe Governu Thailandia fo ba Funasaun Alola iha tinan kotuk sira konsege suporta ona aktividade grupo feto balun iha distritu Bobonaro.