- Publika iha: 24 Agosto 2011
Tuir Vice Reitor Universidade Nasional Timor-Loro sa’e (UNTL), Miguel Maia, katak atividade kalendario akademika ne’e independente no autonomo husi Universidade atu organiza nia kalendario akademika .
“Tuir kalendario akademika Universidade, remata ona nia semester impar iha 4 to’o 14 Jullu prosesu reinskrisaun e orientasaun akademika estudante ida-idak sei hetan orario husi dosente orientador akademika,” informa Vice Reitor UNTL, Miguel Maia, semana kotuk iha Kampus UNTL Dili.
Nia hatutan, dosente orientador ne’e mak fo orientasaun ba estudante sira hodi hili materia tuir Indeks Prestasaun Akademika (IPK) ne’ebe mak sira hetan.
“iha ne’e sir abele foti SKS depende ba rezultadu e mos ba tempu ne’ebe iha,” nia dehan.
“Ami laiha padraun, ami nia universidade independente no autonomo no iha orario rasik maibe kontrario iha tempu kotuk liu ba, ne’ebe Ministerio Educasaun fo sai katak iha loron 15 fulan Janeiru ne’e loron inisiasaun tinan akademika ninian, Nia hateten.
Entretantu tuir Reitor Dili Institute of Tecnologi (DIT), Estanislau S. Saldanha, katak orariu ba prosesu aprendijazen kada universidade mak termina rasik inklui mos ho orariu ba anu lectivu foun.
“Orariu akademiku nian ami mak termina rasik no oras ne’e estudante sira sei eskola hela no iha loron 18 julho komesa ona ezame semestre klaran depois iha Agostu hahu halo ezame final semesteran, depois hahu ho simu estudante foun no ami taka fali iha Outubru to’o Novembru depois Dezembro sei halo orientasaun akademiku ba ano lectivo 2012 nian,” esplika Reitor ne’e.
Entretantu tuir observasaun jornalista iha terenu nota katak oras ne’e dadaun estudante barak mak komesa halo reinskrisaun iha kampus UNTL Dili.