- Publika iha: 11 Julho 2011
Maske iha ejizensia barak husi estudante sira husi eskola publiku konaba farda eskola nian maibe tinan ne’e governu liu husi Ministeriu Edukasaun laiha planu atu define farda foun tanba orsamentu limitadu.
“Ami seidauk bele define farda eskola tanba orsamentu limitadu e osan ne’ebe iha ba deit bens servisu inklui selu salariu ba profesores sira,”hateten Diretor Nasional Planu Estatistika e Teknolojia de Informasaun, Afonso Soares, semana kotuk iha nia knar fatin Vila-verde,Dili.
Tuir nia, kria farda ba eskola publiku importante duni maibe sei iha buat seluk mak importante liu.
“Ami husi edukasaun labele halo buat ida sein iha orsamentu tanba orsamentu ba tinan ida ne’e limitadu duni entaun ami tenke hare uluk buat ne’ebe importante liu,”nia dehan.
Nia hatutan, la’os deit farda eskola, maibe mos iha infraestrutura barak mak to’o agora seidauk resolve tanba laiha orsamentu. “ita hatene katak eskola barak mak aat, meja-kadeira laiha inklui livrus, maibe kestaun mak orsamentu limitadu,”nia hatutan.
Entretantu tuir membru komisaun F Parlamentar, deputada Ilda Maria da Conçeicao, katak ME presiza duni kria farda ba eskola publiku nune’e bele iha unifromedade ba estudante sira.
“Hau hare durante ne’e escola ida-ida kria rasik sira nia farda e ida ne’e ita hare ladun furak , lolos Ministerio Educasaun kria farda nasional ida ba escola publiku sira nune’e bainhira sira tuir eventu ruma sira nia uniforme ida deit,”tuir Deputada ne’e.
Tuir nia, parlamentu aprova ona orsamentu ba planu ne’e maibe to’o agora seidauk implementa. “Osan tau tiha ona iha orsamentu 2011 nian maibe hau la hatene tanba sa mak to’o agora seidauk implementa e osan ne’e tau iha ne’ebe,”Ilda koalia ho lian husu.