Sexta, Março 29, 2024
Total visitors: 766366

Ministru Edukasaun (ME), Joao Cancio Freitas husu ba Diretores no Xefes Nasional no Rejional atu servisu ho dedikasaun no responsabilidade tomak hodi dezenvolve setor edukasaun ho diak liu tan.
“Hau husu imi nia dedikasaun no responsablidade no komprimisu tomak atu bele iha tinan rua ho balun ne’e atu imi kumpri didiak imi nia misaun ne’e ho diak, e hau hein katak bele kontribui ba susesu liu-liu ba politika dezenvolvimentu setor edukasaun nian,”ME, Joao Cancio Freitas fo lia menon ba Diretores, Xefe Nasional no Rejional iha tomada de pose ba sira, semana kotuk iha Vila-verde, Dili.


Cancio hein katak hafoin simu tomada de pose ne’e, diretores sira ne’e bele dezempenha sira nia funsaun ho diak tuir lei ne’ebe iha.”hasa’e imi nia kapasidade tomak atu dezenvolve area edukasaun ho diak liu tan iha future,”nia dehan.


Entretantu tuir Daniel Sarmento, hafoin simu tomada depose nudar Diretor Edukasaun distritu Viqueque, katak ida ne’e hanesan nahan todan ida ba nia maibe nia pronto atu lori knar ida ne’e.


“Hau la dehan katak hau kontenti liu maibe oinsa mak hau bele hadia setor edukasaun iha distritu Viqueque ho diak, tanba responsabilidade tomak iha hau nia kabaz leten e hau presiz aservisu hamutuk ho parte hotu iha distritu ida ne’e,”nia dehan.


Tanba tuir nia, setor edukasaun iha distritu Viqueque, durante ne’e lao ladun diak e presiza hadia, maibe tenke servisu hamutuk ho parte hotu iha distritu Viqueque.


Entretantu total Diretores, Xefe Edukasaun Nasional no Rejional ne’ebe simu tomada depose hamutuk ema na’in 29 e sira ne’e selesionadu bazea ba meridu ne’ebe fo sai husi Komisaun Funsaun Publika (KFP) iha Dezembru, loron 7 2009.