- Publika iha: 06 Agosto 2013
Ministeriu Edukasaun sei hatama material life skill education iha kurikulum eskolar, ho intensaun atu prevene problema partus inresponsabilidade iha future, nune’e estudante sira bele konese sira ida-idak nia an.
Vise Ministra Edukasaun Ensino Baziku, Dulce de Jesus Soares, hateten materia ne’e importante tebes atu eduka labarik sira, konese sira nia moris, tau as sira nia mehi no prepara an hodi atinji mehi ne’ebe sira iha no planea ona.
“Ami servisu hamutuk ho Unicef no Ministerio Saude atu halo programa life skill education atu ema ida –idak konese sira nia an no hatene sira nia risku iha ne’ebe,” Vise Ministra Soares dehan, iha Sentru Konvensaun, Dili.
Razaun atu hatama materia ida ne’e iha kurikulum eskolar, Vise Soares dehan, durante ne’e feto barak mak soe sira nia bebe hafoin partus, tanba laiha responsabilidade .
Maske nune’e nia dehan, nia parte laiha dadus ida kona ba kazu soe oan ne’ebe komete husi estudantes, no esperansa katak ba future sira iha ona konesementu ne’ebe diak kona ba asuntu no redus numeru soe bebe.
Nia konsidera hahalok sira ne’e akontese tanba laiha planu ba sira nia moris, halo arbiru deit ikus mai la prontu atu simu, entaun tenke soe.
Iha lidun seluk, Primeira Dama, Isabel Ferreira, dehan ne’e hanesan problema bo’ot ne’ebe presiza ema hotu atu tau atensaun, tanba hahalok ida ne’e kontra fiar ne’ebe povu Timor –Leste sira iha.
Nia hatutan, nudar feto no inan ida, nia sente triste no kondena tebes hahalok ida ne’e tanba feto foinsa’e sira la prevene an ikus mai isin rua no partus soe arbiru deit, balun to’o mate animal mak han.
“Hanesan sidadaun Timor oan ita hotu preokupa situasaun ida ne’e, sa’tan ita hanesan fiar nain katak ida ne’e hahalok ida kontra ita nia fiar,” Primeira Dama Fereira preokupa.