- Publika iha: 23 Julho 2013
Koordenador Eskola Ensino Baziku Debur-Butir iha suku Funar, distritu Manatuto, Hermenegildo Soares preokupa no lamenta tebes ho professor sira bainihra tuir formasaun, tenke husik abandona estudantes iha tempu aprendizajen.
Knia dehan, situasaun ida ne’e fo impaktu ba estudante sira tanba ezame besik dadaun ona, enkuantu materia barak mak sira seidauk hetan.
“Lolos tempu feriadu ne’e uja ba fo kursu ba alunus sira, mais agora ezame besik tan e sira ba hotu tuir formasaun, hau mesak deit mak iha ne’e ho voluntariu nain rua,” Koordenador Soares lamenta, iha Laclubar.
Durante ne’e, nia informa, profesor permanente iha nain nain hat deit no agora sira nain hat ne’e ba tuir hotu formasaun iha distritu, ne’e impaktu bo’ot ba estudante sira.
“Tidak mungkin professor ne’ebe hanorin iha primeiru siklu ba hanorin fali terseiru siklu,” Koordenador ne’e preokupa.
Entretantu Diretor Eskola Debur-Butir, Nuno da Costa Almeida rekonese katak, profesor permanente nain hat ne’e ba tuir hotu formasaun, imposible professor nain id abele kontrola estudante sira.
“Agora estudantes sira tama hotu dader, ne’e defisil atu kontrola,hanesan alunus terseiru siklu hamutuk sala tolu no hamutuk ho primeiru ano no sigundu ano ne’e sira barulhu para mate,” preokupa Diretor eskola ne’e.
Maske nune’e, nia dehan, labele hapara sira tanba programa ne’e mai husi Ministeriu Edukasuan nian.
Tanba ne’e nia sujere Ministeriu Edukasaun, ba futuru hadia formasaun ne’e atu nune’e labele fo impaktu ba estudante sira nia aprendizajen.
Iha parte seluk, Deputadu Leonel Marcal konsidera ida ne’e fo difikuldade bo’ot ba estudantes tanba material barak mak la konsege hetan.
“Ita koalia kona ba kualidade edukasaun maibe ita la kria kondisaun, e ha foti kestaun ne’e dalabarak ona iha Parlamentu, husu ba ministeriu tenke kria sistema ida ke diak, nune’e labele impede fali prosesu aprendizajen iha eskolas,” katak Deputadu Marcal.