- Publika iha: 22 Julho 2013
Hafoin liu husi kompetisaun ne’ebe kompetitif entre estudantes universitariu nain hat ne’ebe hato’o sira nia speech, estudante Inocencêsio Xavier husi Universidade Nasionál Timór Lorosa’e sai oradór primeiru lugar iha Oradór Favoritu 2013.
Topiku ne’ebé mak Orador Favoritu Primeiru Lugar aprezenta mak hanesan “papél estudante sira nian iha tempu rezisténsia no tempu ukun an no loke kampu servisu promosaun profesionál iha distritu hodi hamenus konflitu iha sidade Dili”.
Tuir Orador Favoritu 2013, Xavier katak, topiku rua ne’e liga ba tema jerál maka sai sidadaun diak no sai eroi ba dezenvolvementu nasionál ne’ebé hanesan tema jeral ba V Governu Konstitusional.
“Tópiku rua ne’e la fasil atu elabora hamutuk ho di’ak, hodi sai responsabilizasaun ba ema hotu-hotu maibé ha’u esforsu kalan rua hodi elabora hamutuk ho di’ak no hasoru mós problema rua mak, ida tempu lato’o ba ha’u, maibe realidade ohin loron hau sai primeiru lugar iha orador favorite 2013,” dehan Orador Favoritu 2013 ne’e ho kontente, iha Kaikoli, hafoin rona rezultadu anunsiu husi juri sira.
Xavier sente kontente no agradese ba apoia tomak husi komunidade sira, espesialmente husi Universidade Nasionál Timor Lorosa’e (UNTL) no kolega balun husi Seketáriu Estadu sira ne’ebé mak esforsu liu husi mensajen (SMS) hodi fo apoia ba nia.
“Ha’u hakarak agradese ba dosente UNTL hotu-hotu ne’ebé maka fó ona kapasitasaun mai ha’u katak buat ne’ebé mak ha’u iha mai husi sira,” Xavier agradese.
Nia mos enkoraja maluk estudante universitariu sira hotu, atu nafatin ho esforsu maka’as hodi involve iha kualker atividade, nune’e bele prepara ba future, sai lideransa ne’ebé diak.
Iha fatin hanesan Sekretáriu Estadu Komunikasaun Sosiál (SEKOMS), Nelio Isaac, hateten atividade ne’e foin primera vez hala’o hodi komemora loron restaurasaun independénsia ronto XI, 20 Maiu 2013.
Nia dehan, objetivu lolos husi atividade ne’e mak, hakarak buka joventude timoroan sira, liu-liu joventude universitáriu sira ne’ebé mak sensibiliza siénsia kultura, siénsia ronto akontese iha rai laran.
“Tanba ne’e mak ita foti tema sai sidadaun diak, erois foun ba nasaun,” Sekretariu Estadu Isaac informa.
Antes ne’e, nia hatutan, haruka uluk karta ba estudante sira ne’ebé mak ronto atu kandidata an ba eventu ne’e, e unversidade hat mak pronto resposta karta ne’e.
Nia afirma, komisaun organizadora fo briefing ba sira no fo tema, hafoin sira ida-idak ba elabora sira nia tema ne’ebé mak korresponde ho tema jerál mak sai sidadaun di’ak erois foun ba nasaun iha V Governu Konstitusionál.
“Iha ne’e ami deside, sé mak sai oradór di’ak liu husi SMS partisipantes povu mak deside tanba ita koopera ho Timor Telekom,” Sekretariu Estadu Komunisaun Sosial afirma.
Atividade Orador Favoritu ne’e organiza husi Sekretariu Estadu Komunikasaun Sosial servisu hamutuk ho Ministeriu Administrasaun Estatal, Ministeriu Edukasaun, Timor Telekom no RTTL, Ep.
Universidade hat ne’e mak hanesan Universidade Dili (UNDIL), Universidade da Paz (UNPAZ), Universidade Oriental Timor Lorosa’e (UNITAL) no UNTL.
Entretantu Estudante UNDIL, Deolindo Correia, hateten ne’e atividade ne’ebe diak tanba maske foun no sira nia ema la sai primeiru lugar, maibe kontente tanba manan esperiensia no ba future bele prepara an ho diak liu tan.
“Ha’u dehan di’ak tanba povu mak hili liu husi sms no juri sira mos fo valor hotu,” EStudante Correia katak.
Tanba ne’e nia sujere ba governu, liu-liu Komisaun Organizadora karik tinan oin realiza tan atividade hanesan ne’e, se bele prepara tan juri no mos aumenta tan konkorentes para atividades ne’e bele halo ema hotu kontente.