- Publika iha: 28 Janeiro 2025
Embaxadora Austrália iha Timor-Leste Caitlin Wilson dehan, Timor-Leste presiza dezenvolve liutan kualidade edukasaun liu-liu iha área formasaun nune'e hodi kontribui ba potensialidade Timoroan nian.

Nia dehan, governu Austrália komprometidu apoiu governu hodi hasa'e kualidade edukasaun iha Timor-Leste.
"Ita presiza dezenvolve liutan kualidade edukasaun liu-liu iha área formasaun hodi bele kontribui ba potensialidade Timoroan nian," nia hatete.
Nia dehan, Austrália hakarak tebes servisu hamutuk ho Timor-Leste hodi apoiu iha setór edukasaun no hakarak hasa'e kualidade edukasaun.
"Buat ne'ebé ami hakarak halo ba Timor-Leste mak ami sei investe $ 50 millaun iha sentru formasaun sira hodi kapasita Timoroan sira bele hetan lalais servisu iha Austrália," nia informa.
Nia dehan, iha tinan 2024 ne’e to'o 2028 Austrália sei fó servisu ba Timoroan hamutuk 10.000.
Aleinde ne'e nia dehan, Austrália mós komprometidu oferese bolsu estudu ba Timoroan sira ne'ebé hakarak kontinua estudu iha nivel lisensiatura, mastradu, iha universidade sira iha Austrália.
Entretantu Ministra Edukasaun Dulce de Jesus Soares dehan, obstaklu sira ne'ebé durante ne'e edukasaun hasoru komesa dezenvolve ituan-ituan ona, tanba hetan mós apoiu husi parseiru sira.
"Apoiu sira ne'ebé mak ita-nia parseiru sira oferese mai ita ne'e hanesan prezente ida hodi kontribui ba dezenvoliventu kualidade edukasaun iha Timor-Leste," nia hatete.
Nia dehan, tanba ne'e lori Governu Timor-Leste nia naran agradese wain ba governu Austrália ne'ebé iha inisiativa di'ak apoiu iha setór edukasaun iha área formasaun nian.