Quarta, Fevereiro 19, 2025

Koordenadór Rede Edukasaun Timor-Leste Coalition for Education (TLCE) Jose Monteiro husu Ministériu Edukasaun (ME) atu aselera karta transferénsia ba estudante sira ne'ebé mak sai vítima ba eviksaun atu sira bele ba kontinua fali iha eskola seluk nune’e la bele asesu trade ba materia sira.

Koordenadór TLCE Jose Monteiro husu Ministériu Edukasaun (ME) atu aselera karta transferénsia ba estudante sira ne'ebé mak sai vítima ba eviksaun atu sira bele ba kontinua fali iha eskola seluk.

“Ita fiar katak Ministériu Edukasaun aselera ona prosesu transferénsia ne'e ho lalais atu bele tulun ita-nia estudante sira bele asesu lalais ba prosesu aprendizajen iha eskola seluk," nia salienta.

Nia dehan, iha estudante barak mak sai vitíma ba eviksaun, maibé sira la iha informasaun ruma kona-ba Ministériu Edukasaun atu fasilita sira hodi asesu ba eskola seluk ne'e.

“Tanba ne'e husu Ministériu Edukasaun tenke fahe informasaun iha área sira ne'ebé mak tama ona iha mapamentu eviksaun nian nune'e sira bele hatene, bainhira sira sai karik sira bele halo lalais karta transferénsia ne'e,” dehan Koordenadór Monteiro.

Entretantu Xefe Departamentu Ensinu Edukasaun Munisípiu Díli António Pereira Ximenes hateten, eviksaun ne'ebé akontese iha área Fomentu ne'e Ministériu Edukasaun fasilita ona estudante na'in tolu (3) hodi halo transferénsia hodi kontinua prosesu aprendizajen iha eskola seluk.

"Ita foin fasilita estudante na'in tolu (3) ne'ebé afetadu ba eviksaun iha área Fomentu ne'e bele kontinua aprendizajen iha eskola seluk, tanba sira-nia inan-aman mai husu karta transferénsia," nia dehan.

Nia hatete, estudante na'in tolu ne'e, antes ne'e eskola iha ensinu báziku Fomentu II, tanba sira hetan eviksaun no sira muda fali ba Comoro entaun halo transferensia hodi kontinua prosesu aprendizajen iha ensinu báziku 5 de Maio Comoro.

"Estudante nain tolu (3) ne'e ita fasilita sira muda fali ba Ensinu Báziku 5 de Maio Comoro," Xefe Departamentu Ensinu Edukasaun Ximenes dehan.

Nia informa, dadaun ne'e Ministériu Edukasaun iha ona ekipa ida hodi fasilita lalais transferénsia ba estudante sira ne'ebé sai vítima ba eviksaun, tanba ne'e husu ba inan aman sira tenke mai hato'o iha Ministériu Edukasaun hodi bele atribui karta transferénsia ba oan sira.